7226 ＸＬ二南方恒科 半年操作總結

近排冇咩寫 blog，因為每日做運動、拉筋花了頗多時間。當然正股、期權操作日日有，但都係之前講個啲，所以冇咩好寫。

由之前三月份文章 跌市的選擇 7226 ＸＬ二南方恒科 開始 trade 7226 已經差不多半年，得唔得都應該做個總結。

7226 ＸＬ二南方恒科 日線圖

看看股價圖，估唔到三月份跌到 7 蚊，調整了 48% 以為都幾平，半年下來，居然再跌多一半到三個幾，由高位跌了 75%。正常買入一隻股票，股價跌了 50%，通常都兇多吉少，但今次結果呢？

7226 ＸＬ二南方恒科 買賣打點

Details 就唔講但看看以上富途的買賣打點，都知 trade 咗無數咁多次。以銀碼計我擺咗 40 萬係個倉到，不過每一 round 大約只買了 20 萬，最多一次也不超過 30 萬，半年下來大約做了 5-6 個 round，居然有 20% 大約八萬蚊盈利，結果真是有些驚訝，因為操作上其實好求其，實驗中冇咩將法。

策略其實在之前文章講咗 第一 round 險勝，第二 round 全勝，第三 round 小勝，只是跌市買入、升市賣出，就係咁簡單。因為五、六月怕五窮六絕停咗買賣，如果以同樣方法操作，可能會達到半年有 25% 回報以上。

以今年來說暫時市況由頭跌到尾，也可以做到正回報，相信升市會更容易做到，那麼我係唔係終於發現了 Holy Grail🤔？即係傳說中投資界的操盤必勝法。

除了 7226，其他正股、期權，還有一隻千年美股蟹貨返生咗，今年到現在為止投資回報超過了 35%。是否進一步引證了我的想法：「長揸冇運行，短炒有淡食！」的投資策略才是長期可以達到回報的正確方法。這一年的改變對比之前可以說是「自信心返咗埋嚟，個人明顯高咗，大只咗！」😅

暫時總結係：

1. 集中持股，只 trade 熟悉的股票(有期權的)，唔殘唔買；
2. 拒絕跟市場跟紅頂白，去買入自己不熟悉的股票或熱門股；
3. 跟據自己的判斷、節奏，不受他人影響，睇少啲其他人評論；
4. 長期維持高現金比例，有機會才出手；
5. 堅持有糊就食，不貪心，持續就是正回報。

當然只是九個月時間，還有好長的路要走，睇下點！

如果覺得文章有用或值得支持，就請 like (like 的方法) 多啲啦！謝謝各位！ 

第三 round 小勝

估唔到兩個月可以做到三個 round，都是因為上落市的關係。今次又是 7226 ＸＬ二南方恒科 主打，其實這篇文章應該 4 月尾寫，因為在 4 月 27 日報導 3690 美團被監管機構調查，怕科指會受影響，所以開市就已經全部清倉。不過想平埋其他正股、期權才總結，所以拖到今日才回顧。

 

7226 ＸＬ二南方恒科 日線圖

今次賺到其實有些僥倖成分，在 A 區兩日買入，純粹因為連續跌了三四日所以博下反彈。而在 B 區全走只因為是 3690 美團的消息，現在看是不錯的操作，但本來今個浪底比上個浪底高，所以預期會破之前頂位才沽貨。

另一個原因今個浪調整不深，所以只買入了上次的一半注碼，而盈利也只有一半，所以想高些價才沽。不過最後不似預期，只有清倉再看，當小勝算了。

這幾日 7226 ＸＬ二南方恒科 不斷下跌，如果以以上 concept 應該要入下又博反彈，不過正如之前三篇文章

• 從人民幣匯價看恆生指數下半年走勢 
• 近期大量股份配股及大股東減持的啟示
• 大市成交額對後市的啟示 

自己對後市比較看淡，所以今個月應該會休戰，直到過了五窮六絕，再看看怎樣。雖然預期就算市況下跌，也不會一下到尾，中間會有返彈，但怕自己走唔切，而且還有一些正股、期權要走，以確保到時分注撈底時，有足夠現金。 

VHSI 1年日線圖

不過暫時好奇怪 VHSI 還是在低位徘徊，今日跌市也沒有上升，又不太似今個月會跌好多🤔。

除了 7226 ＸＬ二南方恒科，上一個 round 有些淨下的正股、期權已經全部平倉，加埋都夠一個月使費，不再細表。至於今個 round 博業績 2601 中國太保，正股贏咗個午餐，期權重博緊，但一彈就會走。又再入了 2238 廣汽集團正股、期權，暫時盈利中，等機會平倉。

最不知道怎樣處理就是 9888 百度集團，之前彈到 $218 走了一轉，但大約 $200 再入返，現價計埋上次盈利輸少少。上次爆完倉，今次是木頭姐走貨，照計沽壓只是暫時，應該越跌越買，但又怕大市下跌會跌得更深。不過加注就一定，反彈再減拉低成本，還有 5 月18 日出業績，看了再算。

今次賺得少，估唔到個翅都差咗，呢間以前食過幾好，今次份量少了好多，冇下次。

如果覺得文章有用或值得支持，就請 like (like 的方法) 多啲啦！謝謝各位！

第二 round 全勝

估唔到咁快就完成第二 round，都係靠 7226 ＸＬ二南方恒科，其他正股只買了 1099 國藥集團，執咗少少。其餘期權仲係等運到，但全部也有微利。

 

7226 ＸＬ二南方恒科 日線圖

其實 7226 ＸＬ二南方恒科 每一 round 也只是幾日內完成，都只是低買、高賣。Round 1 在兩日跌市分段買入，之後 3 日就反彈了差不多 34% 波幅，但分段操作其實只賺到大約投入資金 10%。

Round 2 一樣在兩日跌市分段買入，今次返彈比較慢，6 日才反彈了 28%，但賺到的也是投入資金大約 10% 因為買入價位比較好啲。

整體策略都是跟返市場個 bit，跌個日就考慮買唔買，大陰燭就必買。升個日就考慮賣唔賣，大陽燭或裂口大幅高開必走。

當然如果策略是這樣在 round 0 的時候已經奶咗嘢，就算 round 1 及 2 勝了可能只係打過和。Well，問題在恆生科技指數長期是否會升，有冇得守？而且以暫時跌幅，每個 round 其實大約只用了 20% 整體資金。除非是股災級跌幅，有嬴有輸始終都會追得返。

7226 ＸＬ二南方恒科 波幅比較大，而且大市反彈一定跟得足，所以沒有了揀錯股的煩惱，也不需要分散投資，變成大市升但組合未必升的困局。還有啱啱發現原來 7226 ＸＬ二南方恒科 唔使比印花稅，更加減輕成本，增加回報。

一個月完成了兩個 round，如果每個月也有就好了，不過機會是要等的，第三 round 這兩日有機會嗎？

賺了錢，使咗先至係自己，唔係就永遠幫人哋袋住先，咁同家人食返餐飯就是最好選擇。

今次個湯頭唔錯，老一輩人股票賺到錢都鍾意魚翅撈飯，希望 7226 ＸＬ二南方恒科 可以帶比我每月一餐😅。

第一 round 險勝

之前博業績的 1257 中國光大綠色環保、9698 萬國數據-SW 及契媽股 6060 眾安在線、1833 平安好醫生 全軍覆沒。由打和、輸手續費到輸 5% 不等。不過因為重倉短抄隻 7226 ＸＬ二南方恒科，真係單天保至尊，最後賺咗今個月嘅洗費，全部加埋叫做險勝，跌市算係咁，唔貪心。

不過發現要補充一下之前篇文章，7226 ＸＬ二南方恒科 係槓桿兩倍產品，但兩倍波幅是指即日平均，所以相對恆生科技指數有時會跟升唔跟跌，又或者跟跌唔跟升。而且長期會造成價格偏差，假設今日收市 3033 南方恆生科指 係 $8.00，7226 ＸＬ二南方恒科 都係 $8.00，如果明天恆生科指升 10%，理論上 3033 係 $8.80，而 7226 係 $9.60。但如果後天恆生科指跌返 10%，理論上 3033 係 $7.92，7226 係 $7.68，價格比 3033 更低。即是在跌市 7226 會比 3033 跌得更多，而在升市 7226 又會比 3033 升得更多。至於波幅市，因 7226 有槓桿，所以有時間值損耗，不利於波幅市。

所以坊間有說 7226 不適合長揸，只適合 day trade。我會覺得 7226 是可以 trade 幾個星期之內，但如果想揸以月計算，就可能 3033 會好的。今次我 2 隻也有 trade，講真 7226 波幅夠大，短抄係好好多。而且股價一跌就跌得金啲，好似抵買啲。不過如果買入之後再跌，當然就輸得更多，要看看注碼及各人的承受能力來選擇。

  

3033 南方恆生科

看看上面 3033 日線圖，之前高位 $10.95，暫時今個浪低位 7.665。

而看看下面 7226 日線圖，之前高位 $13.62，暫時今個浪低位 6.550。雖然高位比 3033 多 24%，但跌落嚟比 3033 低 15%。如果以指數始終向上的角度，長線又好似 7226 好啲。但如果呢一兩年恆生科技指數也是牛皮呢？

7226 ＸＬ二南方恒科

賺咗錢，要使咗先至係自己，今次就獎勵了一餐澳洲龍蝦比自己，希望下一 round 可以係雞鮑翅😋。

跌市的選擇 7226 ＸＬ二南方恒科

去年的市況令我不斷反省怎樣的投資才是最穩健，因為年紀不輕，保本最重要。投資方法五花八門，其實無論短抄、長揸、價值、技術、事件驅動、momentum 等，只要可以長期帶來回報就是好方法。而要執行上有效果，方法適合個人性格、生活方式亦都非常重要。例如我性格比較慢，好難做即日鮮，又或是我唔想夜瞓，要我抄美股就好困難。

要保本就只投資大藍籌，不過去年太多黑天鵝，只要美國一話制裁，就算估值幾低，都被殺到片甲不留。而且市場趨向增長型股票，舊經濟公司的估值只會在低位徘徊，好難有價值重估。就算年年增長，只要市場殺估值，長期可能也只是有波幅，冇升幅，而且等待機會成本太重了。

至於增長型股票，我自問都用過 PEG 或 DCF 之類去估值，但隻隻都唔同，睇返其他人點估值，多數都係自圓其說，冇咩可以跟據，佢話值幾多就幾多，咁可以點樣投資這些公司？

香港成立了科技指數 HSTECH，好似是一個幾好選擇，因為指數理論上長期是向上的，只要不高追，在低位買入，贏面比較大，就算短線捱價，起碼有得守。而買賣相關 ETF 斷估唔會咁容易執笠，理論上亦都唔會跌到零，達到我想保本的目的。現在市場有幾隻選擇，例如 3033 南方恒生科技、3088 華夏恒生科技、3032 恒生科技 ETF、3067 iShare 安碩恒生科技 ETF 等。資金多可選擇不同發行公司，再減低這方面的風險。

還有 ETF 令一個好處是不用費神去揀乜嘢公司，有時大跌市撈底，最怕就是捉到大市轉角位，但之後反彈，自己買的股票不升。

最近科技股跌到阿媽都唔認得，咁緊係要搵啲目標睇下，見隻 7226 ＸＬ二南方恒科 好似幾好，因為槓桿了二倍，買得大倍得大，當然輸也輸鑊金。

 

7226 ＸＬ二南方恒科

睇返之前股價，原來由低位 7.065 幾個月就升到 13.62，一年不到也有差不多 9 成升幅，如果斬頭折尾，一年有五成回報都幾好呀！所以今年的目標就放在這一隻 ETF，會將大部份資金都用來買入這一隻 ETF，希望單天保至尊。

不過上面蟹貨重重，現在應該也未到底，所以短期策略都係抄上抄落，分返十零廿注慢慢撈。