2023 年 2 月份交易回顧

今個月恆指下跌2056點，去返兩萬點以下。組合沒有清倉，回調了YTD得返8.5%，如果跌多一個月，應該會冇哂，上個月都話咗清倉好😭。今個月繼續只出不入，有一些股票本來下跌幅度已經可以嘗試博反彈，但今個月又再次躺平 mode。原因係可能有人生第二春（係事業唔係愛情😅），所以要預留資金作準備。

退休差不多十多年，其實完全冇諗過要再工作。而且 touch wood 炒炒買賣都叫做搵到生活費，過下日晨。但人生就是這樣，總是不會按照你所安排而行。如果三月份看不到blog更新，即是暫別炒賣生涯，只可有緣再見。如果繼續更新，就表示冇嘢發生，繼續退休生活。結果會係點呢？我都好想快啲知😅。

 

如果覺得文章有用或值得支持，就請 like (like 的方法) 多啲啦！謝謝各位！ 

2023 年 1 月份交易回顧

恆生指數1月份持續上升，連升3個月，最高22700點，由低位14597點計算，升幅8103點（又係8000點🤔）？組合YTD升了13%，如果以每年15%為目標，一個月已經差不多達標，因此上次想清倉的想法就更加強烈。雖然現今倉位未至於清倉，但也只淨下20-30%。

人的記憶真係咁善忘？記唔記得之前幾年都係咁，年頭做好但整年跌鑊金，好難明白為何還有年頭做好就整年都好的想法，當然主觀願望我都希望由頭升到尾。而且一兩年前就話唔記得啫，但幾個月前都唔記得？好多人真係好金魚記憶，已經唔記得半年前的慘烈市況，gogogo 的聲音又再響起，而且還講FOMO🙄。投資除了買得中邊隻股，timing 其實比買中更重要。同樣是 TSLA，有些人賺到笑，但又有些人輸鑊金。

普通投資者相信好難捉到頂底，但相對高位和相對低位應該不難掌握。而適當利用資金配置就可以平衡風險，升得多減倉，跌得多加倉其實好正常。反而上升了8000點而沒有減倉的人或是現在才追入的人，究竟是什麼心態？貪字得個貧、財不入急門這些傳統智慧可能都冇咩人會考慮。

今個月沒有什麼可以寫了，因為只是減倉，沒有加倉。美股、港股結算後也沒有開新倉，估計之後兩、三個月可能都是在高位徘徊，睇定啲再決定今年方向，再唔係提早收爐可以嗎？😅

 

如果覺得文章有用或值得支持，就請 like (like 的方法) 多啲啦！謝謝各位！