2023年2月1日星期三

2023 年 1 月份交易回顧

恆生指數1月份持續上升,連升3個月,最高22700點,由低位14597點計算,升幅8103點(又係8000點🤔)?組合YTD升了13%,如果以每年15%為目標,一個月已經差不多達標,因此上次想清倉的想法就更加強烈。雖然現今倉位未至於清倉,但也只淨下20-30%。

人的記憶真係咁善忘?記唔記得之前幾年都係咁,年頭做好但整年跌鑊金,好難明白為何還有年頭做好就整年都好的想法,當然主觀願望我都希望由頭升到尾。而且一兩年前就話唔記得啫,但幾個月前都唔記得?好多人真係好金魚記憶,已經唔記得半年前的慘烈市況,gogogo 的聲音又再響起,而且還講FOMO🙄。投資除了買得中邊隻股,timing 其實比買中更重要。同樣是 TSLA,有些人賺到笑,但又有些人輸鑊金。

普通投資者相信好難捉到頂底,但相對高位和相對低位應該不難掌握。而適當利用資金配置就可以平衡風險,升得多減倉,跌得多加倉其實好正常。反而上升了8000點而沒有減倉的人或是現在才追入的人,究竟是什麼心態?貪字得個貧、財不入急門這些傳統智慧可能都冇咩人會考慮。

今個月沒有什麼可以寫了,因為只是減倉,沒有加倉。美股、港股結算後也沒有開新倉,估計之後兩、三個月可能都是在高位徘徊,睇定啲再決定今年方向,再唔係提早收爐可以嗎?😅
 
如果覺得文章有用或值得支持,就請 like (like 的方法) 多啲啦!謝謝各位!    

2023年1月7日星期六

2022 年投資回報檢討

檢討之前看一看2021年及2022年恆生指數走勢圖:

2021恆生指數一年日線圖

2021年高低位計算 31183-22665=8518,以年頭年尾計算跌幅 27087-23397=3690(-13.6%)。
 
2022恆生指數一年日線圖

2022年高低位計算 25050-14597=10453,以年頭年尾計算跌幅 23510-19781=3729(-15.9%)。 2022年跌幅原來跟2021年差不多,但點解2022年好像恐怖啲🤔?

如果比較兩年的走勢,可以算是非常典型的下跌趨勢。
  • 2021年是先高後低,年頭一開波一二月就升了4000點,個個都以為 gogogo,怎知之後係跌足十個月,到年尾也沒有一個像樣的反彈。
  • 2022年由年頭彈了1500點就在2-3月急跌6800點到18235,當人人以為連續四年的調整完結。7-10月又來一鑊下跌7800點,當人人以為世界末日,會跌到10000點,11-12月份又反彈返5500點,然後啲人又 g.........🙄
  • 兩種下跌走勢,那一種破壞力大一些呢?🤔可能唔同人,因為策略不同,而有不同的答案,但相信最大嘅破壞力係把這兩種走勢連續兩年加在一起,咁就無論用什麼策略也是無一倖免地輸錢。

大市升賺錢當然容易些,但下跌輸錢是正常嗎?而跟大市比較真的有意義嗎?

2022年全年埋單整個倉虧損了大約-4.5%,高位在2月份,升了8%,3月份急跌,倉位最差時回撤-35%,10月份的下跌浪,最差時更回撤-50%,2020年的波幅驚人。表面上2022年大市下跌了-15.9%,整個倉跌了個位數好像不太差,但如果比較2021年回報大約25%,就變得非常之差。為何一樣是下跌的市況,2021年可以做到正回報,而2022年做不到呢?

2021年和2022年基本上交易策略也是一樣,交易分開了四類;第一類是指數短炒、第二類是期權交易、第三類是中線交易、第四種就是操作不歸類以上三種的買賣。

2022年第四類操作就只買下一些 ELN 收下息,沒有什麼上落,所以對回報沒有太大影響。

至於期權交易,2022年已實現利潤其實有大約18%,而11-12月的反彈,之前虧損的倉位差不多已經全部平倉。所以今年的期權交易,因為3月和10月下跌也沒有爆倉,其實是做得不錯。

2022年的虧損實際來自第一類和第三類交易,而且虧損超過了-22%,把期權的利潤全部抹殺,變成全年負回報。而虧損的原因不是市況,而只是我自己2021年和2022年的心態不同,就是心理質素的問題。

在2021年,當時的判斷是大市剛下跌,起碼要一年時間才跌完,所以所有指數交易,也是短線,一反彈就全部平倉。因此就算2021年是全年下跌,這方面的交易也是有盈利。但2022年一開始以為大市已經跌完,所以就開始儲2800盈富基金,咁就奶嘢。經過3月份的下跌,見底的信念更確定,結果就更奶嘢😓。而在這段時間2800期權開價又非常差,好難平倉,所以又接了更多貨。不過這兩個月反彈,加上收了息,走下位,Short Call,救下倉,其實虧損已經大幅收窄,不是大問題。

最大問題是7200南方兩倍看多恆指及7226南方兩倍做多恆生科技,今次又是血的教訓,以後我也不會再買賣有槓桿成份的 ETF😭。上年賺埋都唔夠今年輸,我差不多同時間買的3033,2800,都已經平倉有錢賺,但7200,7226可能要升多50%先至返到家鄉。估唔到這些只是兩倍槓桿的ETF,耗損會這麼大😖。

我認為主要原因是這一類ETF,好多時升時就跟唔足,而跌時就會跌突。而且佢計價好似即日清,中線冇跟指數rebalance,變咗個價越來越不合理。還有因為槓桿原因,當相對產品跌的日數比升的日數多,長時間的耗損就令到價格越來越低。美股可能會好些,但以香港股市通常跌嘅時間多過升嘅時間,這些只有兩倍槓桿的產品,其實是完全不值得買賣。買2800還有息收,又可以用期權對沖下,但這些產品就好難救倉。

除了這一大失誤,2022年也將第三類中線交易偏向了一些收息股份,例如0270,0014,0177,1881,2778,3001等,怎知就奶嘢。遇著美國加息,這一類股份大跌。最衰係當你想收息,就會想著長期持有這些股票,而好多時對走勢也不太理會,那就對於最初中線交易的策略相違背。而且這些股份就算收到息,也可能賺息蝕價。不過就算蝕也蝕不了多少,最大的地雷是買了3001,加上7200,7226就是今年最大的失誤😭。

其實在多年的投資生涯,嘗試過不少的策略,最後都只有期權可以長期賺錢,不過因為期權波幅太大,所以自己總是信心不足夠。不過事實證明嘗試其他不熟悉的策略或產品,可能風險更高🙄。

2023年的策略,首先第一和第三類交易要災後重建,相信都要一年半載才可以救得返。雖然2800期權開價唔好,但用來短炒、中線就可以,還有3033,再新加上2822或2823作為第一類交易。第三類中線交易就會集中返有期權和高股息的股票,盡量避免其他股票,希望就算衰咗都可以用收息、期權幫補下。期望2023年可以有返更好的回報💪🏻。

今年開市一個星期就升了1800點(唔通又跟之前兩年一樣😖),整個倉升突咗2022年虧損的金額,如果以今年計YTD已經有6%以上利潤。突然間有一個衝動,想全部清倉,套回所有資金。多年經驗,當大跌市之後,如果返返家鄉唔走,最後都會跌返落去。即是如果現在清倉,之後一定有更好底位可以買返晒全部倉位。記憶中起碼有十次八次都是這樣,最近一次就是2022年3月份,反彈到5月份,整個倉價值剛剛升返跟年頭一樣。雖然當時在高位都平了好多倉位,但之後都迎來地獄式回撒😫。不過就算經歷了咁多次,但都冇一次可以下定決心清倉走人,原因可能是賭仔性格,一日唔睇住個市就週身唔舒服😝,唔知到幾時我嘅道行先可以高一啲呢😅?

至於美股期權,全年上落不多,只提供了大約2%盈利,因為倉位也做得少。年頭年中都好做,就算是輸錢、不斷救倉,但波幅大,起碼搬得郁、救得到。但年尾波幅開始收窄,即月好難開倉。只剩下ARKF及KWEB叫做波幅有40以上,但其他只得返大約20,比好多港股期權更低。受限於每手100股的限制,又搵唔到好多目標,所以都係少少地做下算。

相對好多好多其他人,我的策略其實冇咩參考價值。絕大部份投資者都是每年找不同的版塊、不同的股票去投資,所謂的由上而下選股。不過其實每年的投資成敗靠個人的"眼光",還是運氣佔大多數呢?我好細個就知道自己冇咩運氣,所有嘢都要好辛苦才可以得到,而且又有選擇困難症😅。這幾年做多了期權,專注在一堆期權股票中找機會,成績反而好像不太差。不過今年負回報又將之前建立的信心,打了拆。要行自己的路真的不容易,沒有同路人圍爐取暖,所有做法也要自己摸索。不過單打獨鬥的日子雖然孤單,但只要可以賺取心目中每年的回報,也算是唯一的心靈慰藉😎。
 
如果覺得文章有用或值得支持,就請 like (like 的方法) 多啲啦!謝謝各位!  

2023年1月1日星期日

2022 年 12 月份交易回顧

開始要寫12月份交易回顧,但突然間發現好像唔記得12月交易過什麼😳?經過了7-10月的驚濤駭浪、11月的大反彈,對於12月份相對平靜的市況,波幅大約只有1500點,心情放鬆了沒有之前幾個月的繃緊,所以好多交易也只是隨意而為,沒有太刻意思考,所以就不大記起做個什麼交易。不過平静背後可能又是風暴前夕的寧靜😖。

這一年對於期權的訓練,相信已經做到隨心隨意,即是對於標的物波幅,有更好的掌握。投資不外乎低買高賣,但說易難行。對於百多隻有期權的股票,篩選後大約剩下40隻,進行輪動式低買高賣,說易不易,但說難也不難。以前可能有當股價下跌不敢加倉、股價上升不敢平倉的心魔,但只要克服心理上的障礙就可以輕鬆駕馭。

用以下兩個例子說明:

0753 中國國航 一年日線圖

看看 0753 中國國航 走勢,當大市由7月份跌到10月份,其實股價只是在$7.00-5.50之間橫行,波幅不算大,但期權金可觀,$6.00之下分段SP,接近$7.00就平倉,只要不理會大市的急跌,就必可掌握。反而到了11月大市急彈,股價就不斷下跌才是心理上的考驗,因為當時的跌勢好像有穿之前底部的機會。但相信交易系統,分段SP是最好的解決辦法,我當時就對於每個價位,set 定 GTC 盤,到價就自動SP承盤,心理上便容易處理。跟住12月就傳來開關消息(原來又是春江鴨壓低股價)迎來大反彈,之後就把所有SP慢慢全部平倉,算是又博中一次,然後再等下一次機會。

1093 石藥集團 一年日線圖

另一隻是 1093 石藥集團,走勢跟大市不太相同,7-9月股價只是由大約$8.00跌到$7.00,返而大跌市的10月份,石藥集團是大升至$10.00以外。之前所做的SP已經在這段時間全部平倉。當11-12月大市大反彈,石藥集團反而是跌返去大約$8.00,咁當然機會又來了,12月份就不斷加SP。

經過了11月份的不斷減倉,margin 回復可控水平,12月份的操作就回復了正常,就是在40隻期權之中找機會,低買高賣,去不斷實現盈利。

跌市那幾個月已實現盈利都是負數,12月份終於可以有大約0.8%已實現盈利。而全年埋單整個倉虧損了大約-4.5%,算係執返身彩。但相對2021年,其實今年是做得非常差,犯了幾個嚴重失誤,會在之後的2022年回顧再詳細分析。

12月加倉還有 0902 華能國際電力、0968 信義光能、2238 廣汽集團、1772 贛鋒鋰業,都是同一套路。
 
而12月減倉的有 0358 江西銅業股份、0700 騰訊控股、1336 新華保險、1810 小米集團-W、2600 中國鋁業、2601 中國太保、2800 盈富基金、2822 南方富時中國A50 ETF,減倉比加倉多。

至於美股,不知道什麼原因,有做開的期權,IV不斷收縮。好像DVAX,之前IV是有差不多100,現在只有40幾,期權金不太吸引。而其他 ETF 期權IV更跌到只得20幾,好難操作。這一年的美股期權,以我自定的準則,始終受限於每注100股的限制,好難找到大量標的物作輪動操作。

新加了一些 ETF 再試一試 AIEQ、HERO、DRIV,不過期權金都是很低,不太值博。而且美股我多數做短權,所以所賺不多。

這幾天再思考一下今年的操作,在下一篇文章再撿討。祝大家新年快樂,身體健康,來年更上一層樓🙏🏻。
 
如果覺得文章有用或值得支持,就請 like (like 的方法) 多啲啦!謝謝各位!    

2022年12月1日星期四

2022 年 11 月份交易回顧

大市經過了 4 個月的下跌,11 月份恆生指數終於迎來了一個大反彈,11 月份波幅有 3786 點,完全收復了 10 月份的跌幅,又返返去大約 18000 點徘徊。組合又經歷過山車,雖然大幅反彈,但還是重傷中,YTD 由最差 -50% 上升返到大約 -14%,今年負回報應該是沒有懸念😭。

過去的已經過去,重要的是怎樣災後重建,躺平了兩個月之後,今個月襯反彈就把手上平手或有盈利的倉位大幅平掉。原因不是看好、看差後市的問題,而是操作上需要這樣做。有很多人做期權都忽略了操作的重要性,以為好似書本(神棍) 教授,有錢就 SP,接了貨就 SC 就會賺到錢。現實上要賺錢當然是困難百倍,長期可以係股市賺錢的更是寥寥可數。

以期權 SP 為例,沒有足夠資金做 SP,長期輸面是 100%。自以為有足夠資金接貨,就事無忌憚咁做 SP,其實長期輸面也是 100%。點解嘅🤔?書本(神棍) 唔係咁講㗎🤔?原因是我們沒有考慮過當做 SP 時,對家是什麼人?而為何對家會做 LP 跟自己相反🤔?

大家有沒有經驗,通常 SP 接貨都唔會係低位比你接到?當你以為有一隻心儀的股票到達某一價位,你覺得做 SP 接貨也沒所謂,但最後真的比你接到,你又會很後悔😖。因為當你接貨的時候,現價已經比你的接貨價低了很多、很多。今次跌市隨隨便便也可以找到無數例子,例如 0700 騰訊上升到 $700 幾時,當時有啲人就諗如果跌到 $500、$400 就會同佢死過。最後在 $400 接到貨的人當然非常後悔,因為 0700 之後係跌到 $198.6 🙄。還有 9988 阿里巴巴、3690 美團等、美股有 TSLA、NVDA 等等一大堆......。只要你人生之中求其中一件,大大鑊接了十手百手,基本上以前 SP 賺了多少,一次過就會嘔凸返晒😭。好彩就吸取教訓,幾年後追返,但更多是嚇怕了,以後也不再掂期權。

以上事實帶出了散戶的幾個問題:
  • 第一是對自己太有信心,無論對股票的價值、前景、走勢、升跌等,都以為自己一定是對的,以為自己可以打敗市場。
  • 第二是不理解市場運作,正如以上說為何對手的做法和自己相反?你睇升,但大戶睇跌喎🤔!其實只表示你對市場走勢,一無所知。
  • 第三是太容易受市場、傳媒資訊影響,其實第一點的信心爆棚就係咁樣得返嚟。相信大部份人也不會有內幕消息,好多人天真地認為做了功課就天下無敵,其實只係睇咗幾份報紙或者 blog,就信以為真,最後係比人洗了腦也不自知🥱。
  • 永遠要記住二八理論,如果沒有自己一套與人不同的心得及操作手法,要贏過市場上其他人,基本上是沒有可能。
 
3 月份的跌市,以及這幾個月的跌市,是做期權 SP 的人最寶貴的經驗,過得到這兩種跌市,基本上已經沒有不可以應對的市況。3 月份跌市是一跌到尾然後反彈;這幾個月的跌市是慢慢跌,跌到懷疑人生才反彈。我自己覺得今年算是處理得不過不失,當然進步空間還有很多。但正如以上所說,不要對自己有過份自信,長期的操作,比一次半次輸贏更重要。但很多時看到其他人的所謂檢討,多數集中係一隻半隻股票買早了或賣遲了,就是賺多賺少的問題,其實對整體操作是沒有提升。

以上事實還引伸了一個看法,如果想期權 SP 長期賺錢,第一樣要戒的就是不要有接貨的想法,如果對正股有興趣就直接揸正股。因為買入正股,見到唔對路,可以馬上止蝕。但期權 SP 是有時間性、有到期日,好多時我哋都估唔到期間會有好大變化,中間想止蝕也未必做到。最重要是我們會有僥倖心,希望結算前有奇蹟出現,但現實往往是殘酷的,到了期權結算日,可能股價已經跌了很多,也錯過了止蝕的機會。

另外接貨會把資金鎖死,margin 相對期權要求大,變相整個倉位可以做的 SP 就減少。做 SP 是要賺時間值,是希望貨如輪轉,結算後又可以再做。但如果接了一大堆正股,就會唔夠 margin 做 SP,跟最初原意相違背。所以做 SP 要識點樣處理接貨,其實就是要唔接貨,而唔係以為有錢接了貨就算。

因此這幾個月的做法就是如果 SP 到期要接貨,就一定不會接,會搬倉,轉到去之後幾個月的 SP,月份盡量選可以拉低行使價的 SP。例如有 1810 小米集團 10 月份行使價 $10.5 期權,結算價 $8.72,deep in money,就轉到 2023 年 3 月份行使價 $10.0 期權。同一時間見 $8 個幾好像有支持就做了 11 月份 $8.00 行使價期權,這一輪反彈已經可以由 deep in money 賺返少少走人,平倉之後又可以再找機會做其他 SP。
 
1810 小米集團 一年日線圖

那麼如果接了貨又怎樣處理?事後看這一輪反彈到 $11.0,如果 $10.5 接了貨,不用輸還有錢賺㖭,又話唔接貨比較好🤔?不過由頭到尾經歷過跟事後看圖吹水評論其實完全是兩會事,在 10 月份結算時有什麼人可以估到一個月會返彈 30% 以上🤔?相信估計 11 月份再跌的人會佔了大多數。如果真的接了貨,在心理上要經歷以下考驗:
  1. 當股價反彈了 10 幾 20% 到大約 $9-10,大部份人心裏就會交戰,好不好止蝕呢?輸少當贏喎🤔。有很多人經歷過這樣的大跌市,都有創傷後遺症😳,股價反彈少少就想止蝕。之後無論升跌也無眼睇,一次輸錢就斬腳趾避沙蟲,長期又怎會贏到錢?(不過神棍就最喜歡講止蝕🙄)
  2. 又或是按書本(神棍) 所教,襯反彈時做 SC 減低成本?唔知大家有冇經驗過,做了個 SC,股價上升就唔敢再郁。正股當然唔敢平倉,怕平了之後股價再升,SC 期權就可能會輸無限。那麼平了 SC?但正股又輸、SC 又要輸,怎捨得就咁斬纜。但唔平唔平,股價又跌返落去,更加唔想平😖。不過如果你相信神棍所講,可以先平 SC,然後等股價上升再平正股,那就祝你好運🙄(題外話,同一道理個啲教人做幾隻腳嘅所謂期權 strategy,賺到錢嘅機率其實好低,唔係方法問題,係我哋嘅心魔問題😈。)
  3. 如果 SC 做得唔好,比接貨價低,但股價突然急速上升,升穿 SC 行使價就有比 call 走的可能,那一刻又會天人交戰,怎樣處理好呢😓?由得 call 走,虧損就成定局,再 roll 去下個月,可能股價跌返,從此在低位徘徊,永無翻身之日。
  4. 做 SC 最理想情況是在 SC 結算日,收哂期權金,而股價還在高位,可以沽走正股。但以我多年所見,機會好低,因為通常股價下跌之後的反彈都是急且短,SC 正正就將呢一刻機會鎖死,所賺到的期權金,變成得不常失。
所以通常我都唔會揸正股做 SC,寧願蝕手續費賣咗正股,然後做返個價內 SP,簡單直接,希望用時間值追到幾多得幾多,唔得再搬倉或分倉、加倉,終有一日會返到家鄉😝。而且人人都教的「正確方法」又點會係真正可以救倉嘅方法🙄。

今次篇文章有些亂,可能有很多地方寫得不太明白,不過話咗係災後重建,亂就應該是正常的😅。
 
如果覺得文章有用或值得支持,就請 like (like 的方法) 多啲啦!謝謝各位!