2022 年 2 月份交易回顧

本來想今個月寫多兩三篇期權操作，咁到咗月底回顧就會容易啲理解， 但自己越來越懶，而且當交易持續帶來盈利，就更加提唔到起勁去檢討。

2 月份開局不錯，因為 1 月尾 2 月頭 IV 上升，開出的期權也收到不錯的期權金，而且大市月頭上升，期權金收縮得好快。但其實 IV 在月頭沒有大幅回落，事後睇返當然知道點解，但事前要理解就要有豐富的想像力。雖然月尾大市因為俄羅斯烏克蘭事件急挫，回報唔見了一大截，本來月中預計回報跟上個月差不多，埋尾只剩下一半，有大約 2%，不過其實講真已經算非常之好。

可能大家會奇怪個市跌成咁都有正回報？看返上個月所做的期權：

0688 中國海外發展

0753 中國國航

0883 中國海洋石油

0981 中芯國際

1044 恆安國際

1093 石藥集團

1177 中國生物製藥

1336 新華保險

1810 小米集團-W

2202 萬科企業

2238 廣汽集團

2318 中國平安

2600 中國鋁業

2601 中國太保

2800 盈富基金

9888 百度集團-S

除了 1810 小米集團-W 創了 52週新低，基本上以上股份在今個浪都沒有再創新低，而且有很多股份還在近期高位徘徊。所以雖然整體倉位縮了水，但即月期權金就袋袋平安，因此又一次印證了我現行的交易系統是經得起考驗。

還有以上持倉其實曲線証明市況有可能正在築底：

1）指數下跌，但有大量股份沒有再破新低；

2）大市成交開始減少，之前文章 大市成交額對後市的啟示 有分析過，大市要見底一定要成交少，不是坊間以為的大成交上升才是見底；

3）雖然這樣說很涼薄，但近呢廿幾三十年，從來打仗大市下跌都係入市良機，因為通常打杖不會持續太耐，對市場沖擊只是短暫。而且打杖地點不會是什麼主要金融中心，所以對金融市場影響其實極之有限。

如果之後幾個月是上年跌市的整固期，走區間高賣低買應是不錯的策略。

2 月份第一類指數短炒又係做得非常差，科技指數 2 月份創了新低，越來越難炒，連幾千蚊都冇。反而 SP，SC 2800 盈富基金可以講一講，相信有好多投資者因為坊間的一些財演或甚至好多 blogger 也推崇而做了月供盈富基金，但我在之前文章也有講過其實這不是一個好的策略。其中一個原因是普遍人月供 2800 盈富基金是想就算指數不升，也可以收下息，但因為近年指數加入了大量科網股，所以息率越來越低，收息變成了非常雞肋。

大家要明白點解美股指數係咁升，但港股就多年唔多升？我哋知道其實指數的構成是由成份股所組成，而幾時把什麼股份納入指數，就是這個指數長期表現的關鍵。其實就好似基金經理選股加時機就直接影響了基金回報一樣，因此港股不是廢，廢的是恆生指數服務公司決策指數成份股變動的所謂專業人士。看看 0992 聯想控股三出三入，完美地高位追貨（納入成份股）、底位止蝕（剔出成份股），咁嘅操作手法，個指數又點會升。不過這些操作手法就是財演、傳媒最追捧的交易系統，咁月供 2800 盈富基金得唔得就自己諗🙄。

講返 2 月份一樣 SC 了 $24.00 及 $25.00，跟上個月一樣，高位去到 $25.16，本來又呻笨賺少咗，點知到月尾又唔使交貨。如果揸正股，沒有做期權，等收息，兩個月下來得過吉。2021 年 2800 盈富基金只派息 $0.67，現價息率 3 厘都冇。而我 1 月份 SC 收了大約 $0.2，2 月份因為 IV 高，收了大約 $0.48，兩個月收了 $0.68 比去年收到的股息還要多。

好多人都講現金流投資，多數係樓、債卷及 Reits 或股票收息，但用期權就相對少人講（多數人做 Long 食大茶飯）。但樓、債卷及揸股票收息都要 hold 住大量資金，只有期權可以每個月清而不需要投入大量資金，當然技術含量就要高啲，但熟能生巧，做多啲自然會識。而且記住投資市場只有少數人賺到錢，多人做的方法得唔得又係要自己諗。

第二類期權交易 - 暫時 3 月份開了以下股份，跟上個月一樣，現在 IV 高，有利 SP，但因為心急，結算前已經開了一些，所以又是捱價中。

0011 恆生銀行

0358 江西銅業股份

0688 中國海外發展

0700 騰訊控股

0883 中國海洋石油

0941 中國移動

0968 信義光能

0981 中芯國際

1044 恆安國際

1093 石藥集團

1177 中國生物製藥

1336 新華保險

1810 小米集團-W

2202 萬科企業

2238 廣汽集團

2318 中國平安

2601 中國太保

2800 盈富基金

9888 百度集團-S

另外美股期票比重越來越大，3 月份做了以下股份，但還是摸索中。

ARKF

ARKX

BOTZ

CWEB 

DVAX

FXI

ICLN 

MCHI

不過美股結算在每月第三個星期五，所以 3 月份期權全部在打杖前開了，有少部份已經入咗價，月尾要有接貨的心理準備。

第三類中線交易 - 本來 0753、1093、2800、0883、1044、2601、9888 都做了 SC 入咗價，諗住月尾交貨，整體回報就跟 1 月份差不多，怎知到尾只有 0753 及 1044 各一注被 call 走。雖然賺了少，但期權金就收哂。

3 月份因為有可能要調動資金，會隨時賣走手上持股，所有 SC 會暫停一個月。正股加期權的好處就是這樣，可以非常 flexible 不用長期把資金放在市場，其實變相減低了很多風險。因為當投資者把資金投入市場，就要面對市場波動的風險，投入越大，風險就越大。很多財演由其是黃x英最反對投資者清倉，但其實懂得清倉的投資者，才是最清醒的一群。試想想好似過大海，懂得割禾青的賭徒，先可以有錢買船飛返香港，長揸必贏其實是個謬論。

文章好似越寫越少，因為期權文章其實冇咩人睇，所以這些文章我也不知道可以分享到幾時，只希望有緣人可以看到有些領悟，對投資有幫助。

如果覺得文章有用或值得支持，就請 like (like 的方法) 多啲啦！謝謝各位！   

2022 年 1 月份交易回顧

在 2021 年投資回報檢討，全年盈利是由四類交易所組成，第一類指數短炒及第二類期權都要勤力做 trade，而上年其實都係做下，停下，求求其其。今年就希望專注一些，睇下回報會唔會好啲，所以盡量每月做個回顧，逼下自己要做多啲 trade。先講成續，1 月份回報破了由上年以來單月份紀錄，已平倉的交易賺到的金額佔本金大約 4%，比目標多了一倍。

第一類指數短炒在 1 月份成績只是一般，比對上年開始炒 7226 的時候，現價跌了差不多一半，而波幅亦都比上年縮少很多，所以低買高賣的難度變得更高，回報相應就減低。還有因為希望食大茶飯，所以減少了短炒，增加了中線的倉位，埋單一月份這方面回報只有幾千蚊。

還有恆生指數比科技指數更強勢，因此短炒就加埋了 7200，兩邊炒。

加上之前提過的收息倉，有一部份資金配置了用來買入 2800 盈富基金。用意是當買入的槓桿債基要 call margin，可以把 2800 馬上套現，用這一部份錢頂住就唔使爆倉。不過只買入 2800 盈富基金等運到又好似太被動，所以 1 月份就開始了 Short Put 及 Short Call 盈富基金期權去增加收入。

方法是：

1. 把配置的資金大約一半買入 2800 正股；
2. 然後 Short Call 即月高一蚊或兩蚊行使價；
3. 另外把餘下的一半資金用來 Short Put 低一蚊或兩蚊行使價預備接貨。

例如之前 12 月用了一半配置的資金在平均價 $23.5 買入了 2800 正股，在 1 月初結算之後就 Short Call 了一半倉位在 $24，另一半在月中升近 $24 時 Short Call 了 $25。雖然 1 月份 2800 最高升到 $25.12，$24 要交貨好像賺少了很多，但結果 1 月份結算在 $23.68，發了一場夢。不過 Short Call 期權金就袋袋平安，如果冇做期權，只是買入 2800 正股又冇平倉就真係空歡喜一場。

除了 Short Call，在月頭還 Short Put 了 $23，所以都係袋袋平安。

做了這些動作，只計已收的期權金，一個月收了大約配置的資金 1%，理論上如果每月持續做每年就可以有 12% 回報，應該比齋買入正股等運到回報更高。用 2800 做標的物主要因為恆生指數每月波幅大約 2000 點，相對於 2800 就變成了大約 $2 波幅。以恆生指數歷年都是波幅大，升幅少，這方法希望可以增加持有盈富基金的回報，得唔得年尾就知。不過這方法有一個問題，原來 2800 咁多人買，但期權成交就非常疏落，而且莊家出價亦都唔貼價，差價非常大。ATM 好一點，但上一蚊或下一蚊已經好難成交。

除非像這兩天 VHSI 升到 25，成交才比較容易，2 月份的倉位一樣 Short Put 了 $23，Short Call 了 $24 及 $25，但期權金比 1 月份多了差不多一倍，算是不錯。總體上第一類交易 1 月份盈利佔了本金大約 0.5%。

第二類期權交易，1 月份開始做即月及遠權（去年大部份只做遠權）。即月有 Short Call 及 Short Put，Short Call 主要被 Call 走了 0688 中國海外發展 及 2601 中國太保，通常 Call 走了我會在低一個行使價再 Short Put 下月執返啲，平衡一下被 Call 走的不忿心情。好像 0688 中國海外發展有一注在 $21 被 Call 走，就會即時 Short Put 下月 $20 去幫補下。

至於 Short Put，看見有網友分享本金只有百多萬就一次接了 39 萬倉位，現金變負數，要撲水去救倉。雖然每一個人對 Short Put 有不同的做法，但唔 overtrade，有足夠資金接貨是 Short Put 的長期成敗關鍵。時刻抱住僥倖嘅心態，就變成出嚟行，遲早要還。而且好唔明點解好多人都會覺得自己睇位好準，買入價一定係低位，唔會再跌。而買入時又好像冇諗過入價要點處理，到真係要接貨，接咗就以為止蝕、斬咗就得？下次好彩就可以賺回來？咁同去澳門買大小有什麼分別🙄。

我自己 1 月份做了差不多 80 個 Short Put，分佈係 23 隻股票期權不同行使價，結算只有兩注接了貨，比率 2.5%，接貨金額佔本金只有 1.8%，其餘期權金全部袋袋平安。第一是 1810 小米集團-W 在 $17.5 接了貨，而且即時 Short Call 了 2 月份 $18，即是成本大約 $17，現價只輸少少。

第二是 1044 恆安國際在 $39 接了貨，而且即時 Short Call 了 2 月份 $40，即是成本大約 $37.9，比現價還低，只要彈一彈，就可以平倉走人。

所有即月 Short Call 及 Short Put 大約貢獻了 1 月份盈利 1%，加上有些遠權平了倉，總體上第二類交易 1 月份盈利佔了本金大約 1.5%。

因為 VHSI 升咗，所以結算前一天及結算日已經偷雞開 2 月份 Short Call、Short Put，暫時已經開了一大堆，相關股票期權如下：

0688 中國海外發展

0753 中國國航

0883 中國海洋石油

0981 中芯國際

1044 恆安國際

1093 石藥集團

1177 中國生物製藥

1336 新華保險

1810 小米集團-W

2202 萬科企業

2238 廣汽集團

2318 中國平安

2600 中國鋁業

2601 中國太保

2800 盈富基金

9888 百度集團-S

第三類中線交易就清倉了 0688 中國海外發展，因為去年尾開始想分散到其他跌得更多的股份，所以持倉已經減少，雖然這個浪因為改變打法，做了 Short Call 賺少了。但由 2020 年美國無理頭制裁，到現在兩年多，算是帶給不錯的回報，最後呢注賺到的帶給 1 月份盈利大約 1.5%。之後除非跌返 $20 以下，相信也只會做 Short Put 且戰且走而唔會揸正股。

本來想整個 100 萬模擬收息組合，但原來自己都係冇咩恆心，之前買入一些 Reits、地產股、高息 ETF 見 1 月份市況差但有資金追入就食下糊，算是貢獻 1 月份盈利佔了本金大約 0.5%。

其實整體資產在 1 月份升了 10% 以上，但每月回顧只計已經平倉的盈利，因為多年的經驗，計浮盈其實冇咩意義，一個浪就可能嘔凸。

這個月還加多了一些美股期權，不過其實都係中概股佔多，而且只佔整體倉位好少部份，純粹試驗性質，暫時有以下倉位：

CWEB 

DVAX

FXI

ICLN 

MCHI

以後看成績如何才分享想法，最後祝大家虎年身體健康、新年快樂。

如果覺得文章有用或值得支持，就請 like (like 的方法) 多啲啦！謝謝各位！