2022年10月31日星期一

2022 年 10 月份交易回顧

10 月份港股進一步下跌,恆生指數今日最低位 14597 點,年波幅已經超過 10453 點。什麼支持位也穿晒,非常無奈,但也要接受現實😒。

vHSI 五年週線圖

VHSI 今個月最高 45.11,週線有拉針,比對之前,大市叫做有短期見底條件。但比起 9 月、10 月份跌幅,又不是太匹配恐慌程度。

不過去到呢啲位,基本上無形之手,想跌到幾點就幾點,已經沒有得估計。好像 10 月 24 日跌一千點的一日,以前事後傳媒都會找些藉口解釋下,今次連解釋也慳番,要跌就跌,完全體現港股被操控的事實😤。

有好多人以為冇買股票,市況升跌唔關佢哋事。其實港股的升跌,只要是打工仔就關事,因為每個打工仔都要供強積金,今個跌浪,全香港人都要埋單,只係唔知阿爺幾時先肯出手打救我哋🙄?好多香港人以為香港人好叻,其實冇阿爺照住,香港人只有比人玩,而完全無力招架。

上個月講躺平,其實是有必要的,今個月組合當然蝕鑊金。但因為之前沒有太多倉位,所以還頂得住,未爆倉,不過如果跌到 12000 點就好危😖。做期權 SP 是賺 11 個月,輸 1 個月就爆倉的操作,能夠避開這一個月就是至勝之道。今次跌市跟之前最大分別是跌得好慢,以前是跌得又快又急,好快見底。每日波幅可以是 1-2 千點或以上,但跌得急反彈也急,叫做可以偷下雞搵食。但今次是每日跌幾百點,反彈弱,連續跌了差不多兩年也沒有一個像樣的反彈,完全只得挨打😓。對於這種走勢,只有躺平,不再開新倉,最少等有一個月拉針,可能見了短底,才開始少量加倉,慢慢追回之前的損失。不過如果今次像 2003 年,又可能沒有拉針,上次跌市後期就是市況慢慢跌,之後就在不知不覺中,慢慢回升。不過除了等待,請記住恆生指數每年也有大約 8000 點波幅,現在 14500 點,下年的波幅機率是向上還是向下多呢🤔?雖然上年我也是這樣希望😣,而且黎明前的黑暗真係好長😭

其實躺平是指不再開新倉,但現有倉位也是要處理,在這些時候有幾點可以注意:
  • 到期的近權,可以唔接貨的盡量唔接,搬倉去遠權。因此 10 月份,11 月份所有到期的美股、港股期權也沒有再開新倉。基本上不再做近權,而到期要轉倉的就轉了去遠權,等市況穩定之後再慢慢救倉。
  • 這些大時代日子,好多莊家當市況一波動就唔開價,或者擘價好闊,但到了結算日,開價也會比較合理。個別開價差的期權,可以在結算日轉到開價比較好的,但盡量轉返同一板塊。例如之前說過倉位一大部份虧損主要都是盈富基金 2800 相關正股及期權,而近期期權不開價的情況比之前更差,所以今個月要轉倉的倉位,決定轉了去 KWEB。揀 KWEB 因為波幅大期權金多,希望大市反彈,KWEB 比 2800 更容易走得甩,最重要是無論近、遠權、什麼行使價也非常容易用合理價成交。而之後也不再開 2800 期權及正股,因為實在操作不了,直到見到開價有改善再考慮。
  • 又一次證明,要玩期權,預備金的重要性。今次要躺平,因為沒有準備到預備金,所以操作上不可以像 3 月份跌市時,趁 IV 升高,可以狂開新倉同佢死過。但今次跌市前走了大部份倉位,暫時沒有爆倉,也算是另一個跌市經驗,過得到今次,又是一條好漢😅。
難捱的都要捱,只希望跌市快點過去,可以再有好日子過😭。
 
如果覺得文章有用或值得支持,就請 like (like 的方法) 多啲啦!謝謝各位!  

22 則留言:

  1. 有目標同信念較易捱得過。無忌兄面對股災的靭力是我學習榜樣。願兄安然渡過。🍀

    回覆刪除
    回覆
    1. 千祈唔好學我,我經過咁多次股災都係唔識得學精,都係不斷犯錯😓

      刪除
  2. 其實跌市前平左大部份倉位,咁已經唔係躺平了, 至少槓桿水平無咁高
    不過真係要面對新環境, 始終而家係有果個不能寫的事件影響住中港地區股市

    回覆刪除
    回覆
    1. 有什麼是不能寫的事件?不太明白,請指教。

      刪除
    2. 不贅, 總之好似喳車咁, 遇髮夾彎要減速扭軚, 就可以了, 加油

      刪除
  3. 加油,港股外資可以輕易沽空,普通散戶做不到沽空,這點有利有弊。期權市場不活躍,bid/ask spread大,深度不夠也是很欺負散戶的地方,隱性成本好高。用put spread,大跌時食左long put利潤,同時short put捱到接貨,收取權金,遠比只short put好得多。最後係保持身心健康,就是真正財富。

    回覆刪除
    回覆
    1. 問題在係唔知幾時先至跌,因為通常跌係又急又快。其實我8月份做了一些LP做對沖,點知8月未跌,全軍覆沒,然後9月就冇再做,諗住睇定啲,點知就.......😓

      刪除
    2. 此留言已被作者移除。

      刪除
    3. 一點小意見,不是教你trade。多多包涵 =]

      刪除
    4. 不是的,可以留意多些市場的看法,在9月時有好多人是等待二十大後再行動;美股則是在8月22日Jackson hole會議前有擔保隔夜融資利率期貨被大舉沽空,賭美聯儲轉鷹。做Collar又或者Put spread可以長少少,覆蓋這類風險事件。也不怕蝕time value,你有short position。

      刪除
    5. 不用介意,你有很多想法我要跟你學習。我有留意市場看法,所以8月份才想做一些對沖,但始終給3月份的走勢欺騙了,也沒想過跌得這麼深,下次是要做多些對沖。

      刪除
  4. 我只係將部分10月的期權轉到11月。
    你轉到有幾遠期?

    回覆刪除
    回覆
    1. 我多數轉到下年3,6,9月不等,因為預計就算11,12月反彈也未必走得甩。而且遠權delta冇近權咁敏感,如果大市再跌,margin 可以捱多啲。

      刪除
    2. 選3,6,9那個月,會以最近,但又盡量可以轉低一個行使價為先,咁會快啲返到家鄉。當時開價好唔好也是決定因素。

      刪除
  5. 支持分享。

    呢個月都幾難捱,不過股災左咁耐都開始習慣,感覺就算跌串一萬,我都冇曬感覺,有d似溫水煮蛙,哈哈。不過仍希望過多幾年,又可以絕處逢生啦。

    回覆刪除
    回覆
    1. 希望在人間,大市始終會升返,唔係邊有得再大跌🤣

      刪除
  6. // 好多香港人以為香港人好叻,其實冇阿爺照住,香港人只有比人玩,而完全無力招架。
    同意. 你以為香港變咗質, 宏觀啲睇, 係外在不斷透支香港, 無論政治同經濟. 香港攪個event, 都會俾老美出口術叫人唔好黎就知.
    既然係咁, 想喺資本市場搵錢, 我唯有選擇避開港股一段時間, 係好無奈, 但無謂跟市場作對

    回覆刪除