股壇無忌: 月供股票記錄 2019-01 (第1期)

2019年2月1日星期五

月供股票記錄 2019-01 (第1期)

話說2017年股票市況熾熱，2018年初家母及一友人就叫我幫佢哋買吓股票，想賺啲外快。咁當然唔會出出入入，買啲股放係到收息算。

一年過去，家母嘅倉位2018年居然賺了廿幾個% (主要是 6823 加上收息)，而友人個倉出出入入多，反而只有十幾%回報 (主要是 0177及0576兩隻公路股)。

友人見市況差都賺到錢就心雄，想每月出糧撥出一部份月供股票，希望10年後可以靠收息過活退休。但我自己比較多炒年波幅令資產增值，不太適合友人。看見很多 blogger 也是朝這方向建倉，所以今次試下抄其他 blogger 嘅功課，睇下交唔交到差。

由一月份開始，每個月投入三萬蚊，去買不同的股票，所有股息會再投入。初期每月可能會買超過三萬，因為每隻股票手數不同，買突了下一個月填番條數。大多數人月供股票會先選擇某幾隻股票，然後每個月也買入特定金額，長期投資可算是平均買入法。

但我的做法有些不同和複雜些，我會每月揀選2-3隻不同股票買入，股票可以是現有倉位已經持有或是沒有，沒有上限多少隻股票，因為友人目標是收息過活，所以條件只是買入股票現價週息率大約有4厘之上。除了買入股票，也會賣出走位。還有如果揀選的股票有 option，會做 covered call 或用 short put 接貨。

每月只會月尾記錄一次，全部倉位在 IB，用 IB 佣金計算，因為 IB 交易成本比較平，而收息不用收手續費。如果係銀行，每次收息收30蚊，初期股息不是太多，收埋都唔夠畀銀行手續費。而且用 IB 做 covered call 或 short put 接貨方便好多。

股票買賣

今個月買入了3隻股票，大致如下：

1) 1052 越秀交通基建

第一隻股票是抄 Forest Capital 收息股收藏家，1052係佢最大持股。其實之前也有分析過 1052 越秀交通基建 2018-06-30 中期業績，但跌到五個幾唔記得買。

最近上廣東省旅遊經虎門大橋，其實車流量已經飽和及經常塞車。近期好多公路股急升，但 1052 升幅相對溫和，相信主要是投資者擔心虎門二橋今年通車或會影響虎門大橋收入。

買入 2000股@$6.00=$12000
以2017年全年股息 $0.36 計算，買入價週息率6.00厘。
以 IB 預計 2018年全年股息 $0.38 計算，預期週息率6.33厘。
下次業績公佈大約02/2019，除淨日大約16/04/2019，還有74日。

如果以五年平均息率高低5.40-7.29厘作估值，買入價在中間位置，其實不是太吸引。但中期息有增加是好的開始，而且月供就要搵嘢買下，再跌下個月便再增持。

2) 3399 粵運交通

呢隻股係睇偉哥投資手札，風險可能好高，但其實派息呢幾年都幾穩定。中期業績就唔多好，偉哥都好似減持咗一半，所以其實有機會減派息。不過派息比率低，如果管理層有心派，係可以維持到。今年好似有機會上A股，唔知會唔會炒返轉。

買入4000股@$2.90=$11600
以2017年全年股息 $0.183 計算，買入價週息率6.31厘。
以 IB 預計 2018年全年股息 $0.1849 計算，預期週息率6.38厘。
下次業績公佈大約04/2019，除淨日大約12/06/2019，還有131日。

如果以五年平均息率高低3.29-6.71厘作估值，現價在估值偏上位置。但2014年曾經去過12.7厘，要跌可以有排跌。

3) 2388 中銀香港

見到 GOLD ETF (Billy講股) 係低位食咗一轉才後知後覺計下數，五年來派息都穩定，派息比率大約50%，要維持應該不難。現價可能高追，真係跌返落廿蚊，就每月買一注，咁今年就唔使再找其他目標。大股喎，衰咗同友人都有交代。

買入500股@$30.00=$15000
以2017年全年股息 $1.303+0.095 計算，買入價週息率4.66厘。
以 IB 預計 2018年全年股息 $1.09 計算，預期週息率3.63厘。IB 預計應該冇包括特別息，希望今年也有。
下次業績公佈大約03/2019，除淨日大約28/06/2019，還有147日。

如果以五年平均息率高低3.68-5.23厘作估值，假設派息同2017年一樣，買入價在中間偏上位置。52週高位$42.15，今年暫時低位$27.55，回調了34.6%。五年平均回調波幅大約31.1%，當然2015年就回調了44.2%，如果今次一樣即有機會到$23.5。

期權買賣

1) 2388 中銀香港

Covered Call

買入500股 2388 同時 short call 了一張4月份$32.00 call 收期權金 $0.50。

💡：Idea 係收息要等到6月，如果3個月升到$32.00 連期權金$0.50(實收$0.462)。就算被 call 走，回報 $2.462÷$30.0=8.2%。即是本來這一筆資金期望年回報4.66%，現在三個月已經完成使命，可以留侍下次再找機會。

如果冇被 Call 走，就收多$0.462，唔好彩減派息也可以補返條數。

Short Put

Short Put 了一張3月份$29.00 收期權金 $0.43(個價做得唔靚)，因為太遲做，2月份期權金太少，畀埋手續費得個吉，所以只有做多一個月。

💡：Idea 係反正平均成本法，我會傾向股價下跌就平均每月買入，多過每月特定一個日子買入。所以如果2月份 2388 跌到$29.0 就會再入，咁不如先收啲期權金幫補下。如果接貨，成本是 $29.0-0.43(實收$0.392)=$28.608。

風險係股價下跌到$29.00，但期權到期日升返上$29.00接唔到貨，咁到時如果股價在$29.392之下，也可以買入，之上就再睇下有冇其他目標。

2) 1658 郵儲銀行

想揀一隻內銀股，其實有很多內銀股息率都好吸引，但因為最近都升咗好多，所以可能要等一等。揀郵儲銀行因為升幅相對冇咁多，可能係息率冇咁吸引。而且揀收息股，最好有起碼五年穩定收息紀錄，但郵儲銀行只係得兩年。

雖然呢篇文章博立 – Larry Hung x Michael Kan 已經係上年，去年郵儲銀行係最好嘅內銀股，咁估計今年應該都唔會太差掛。

而且阿誠哥接貨都接到手軟 ELN失利李嘉誠再接郵儲行，我只係 short put 一手，應該唔死得人掛。