2022年4月15日星期五

2022 年 4 月份美股期權交易回顧

美股昨天又結算,之前有啲奶嘢嘅倉位,經過搬倉,已經順利救返兼且有盈利,未得個啲唯有繼續搬倉到 5 月份,再等運到。今個月已實現利潤暫時執了 0.6%,希望港股月尾結算生生性性,可以回復每月賺 2% 的目標。

暫時美股期權倉位如下:

ARKF
ARKX
BOTZ
DVAX
FXI
GSG
IAU
ICLN
KWEB
MCHI
SLV

5 月份加了些金 IAU、銀 SLV、商品 GSG ETF 試下水溫,因為俄烏事件引申出美國佬已經做事全冇底線,需要反思一下未來投資的方向。

3 月份恆生指數居然可以跌穿二萬點,而且去到萬八點,穿哂所有長期指標,相信好多人都估唔到,但背後的原因可能更值得深究。

近兩年美國不斷打壓中概股,對香港中資股制裁,限制美國人投資中國企業,其實可能是為未來制裁香港及中國作準備。

從今次制裁俄羅斯的方法,阿爺或許對 A 股市場會有所準備,作出應對,但香港呢?當好多人天真地以為唔會嘅,美國佬唔會咁做。但其實要反問一句,美國佬真係同香港有親咩,點解唔可以制裁香港?如果美國人的利益在香港不斷減退,要打擊中國,制裁香港其實是一個很好的手段。2019 年社會事件,如果唔係阿爺有應對,香港可能已經冧咗。睇到烏克蘭暫時的景況,如果對西方還有美麗的幻想,可能都係智商問題。

以今次恆生指數跌到萬八點,其實係唔係一個警號?可能有人會覺得我危言聳聽,但人到中年,要保住現有財富,真是要諗多一步。就算最後沒有發生,也不會有什麼損失。而且香港人大部份財富已經係層樓到,但要住嘅其實都走唔甩。所以如果投資股票上都奶嘢,就變成雙重打擊。

暫時我還未想到怎樣應對,或者投資那些市場、板塊、公司可以分散這方面的風險。時間上我會覺得俄烏事件未解決,就應該未燒到過嚟,但如果未來一年有一個反彈,應該會全清倉港股,希望到時會諗到點走下去。暫時只諗到金、銀、商品之類,由 2018 年美國開始跟中國貿易戰,已經將全球供應鏈破壞,要恢復,基本上冇幾年時候都唔會變返正常。同埋如果美國佬唔收手,又點會變得返正常。

當然很多人聽到港股有問題,自然就會講美股。我自己很少投資美股,以前試過,後來唔想夜瞓,所以就放棄了。現在睇美股期權,也只是睇開市後一個鐘。

另一個原因係老人家的固執,當投資係一間公司的時候,作為投資者其實係對該公司作出支持。如果一間公司冇投資者,發展一定不會太好或順利。反過來,投資者多,股價升,公司有錢去投資、請人就可以霸佔市場,扼殺其他公司嘅生存空間。睇下 Elon Musk 一唔 likey 就買起人間公司,幾型🙄!因此好似軍工、煙草等公司我就一定不會投資。

所以我也不想投資美股,由其是 GAFAM 或 FAAMG,作為中國人其實係冇得選擇,現在西方針對中國係鐵一搬的事實,你去支持人哋,就等於攞石頭揼自己隻腳,最終受傷是自己。如果國家四分五裂,個人財富還保障得到嗎?

可能有人覺得咁樣投資好戇居,總之賺到就得。賺錢可以有好多方法,如果冇底線咁只係比金錢蒙蔽了雙眼。

又舉個例子我自己不喜歡去日本,原因唔係我唔鍾意日本,而係你去日本,幫助了日本經濟,但結果日本政府唔係將賺到嘅錢用返係人民到,而係加軍費(台灣都係)。而且大概率好似烏克蘭週邊國家,如果台海有戰爭,日本好可能支持台灣或做美國幫兇,打返中國。到時打理香港,咁我去日本旅行未貼錢比佢哋打返自己,咁係唔係好戇居嘅自殺行為(咁講一定得罪好多人🙄)。

都係講遠咗,通常都只講投資不講政治,寫出來都只是想整理一下思緒,希望想到未來投資方向。唔啱聽嘅,睇完就算,不喜勿插。

如果覺得文章有用或值得支持,就請 like (like 的方法) 多啲啦!謝謝各位!  

2022年4月3日星期日

2022 年 3 月份交易回顧

 
經過了驚濤駭浪的 3 月份,終於等到結算,可以定一定下來,輸贏也已經成了定局。先講成績 YTD 2 月份最高的時候賺 7.5%,之後短短兩個星期到 3 月 15 日跌到 -35%,高位計跌了四成有多,最後 3 月份埋單計 -6%,暫時算係執返身彩。但如果中間爆倉止蝕,就冇仇報。
 

從以上列表,可以比較一下今次跌浪跟之前的跌浪有什麼相似地方:
  • 今次跌浪歷時 13 個月(暫時),除了 2003 年,是最長的跌浪。正常跌浪最少都要 9 個月,所以學識清倉、等待其實係非常重要;
  • 今次跌了 12948 點,除了 2008 年,以點數計是歷年之最;
  • 以百分比計跌了 41.5%,也是比通常的 3x% 跌幅多一些;
  • 雖然 3 月份跌浪好似好驚嚇,但其實跌幅都沒有 2020 年 3 月厲害(又係 3 月🤔),比起 2008 年更加冇得比;
  • 做期權最重要的波幅 VHSI,IB 數據只去到 2012 年,所以之前沒有數據參考,但記憶中 2008 年波幅應該超過或接近 100。
  • 今次 VHSI 暫時最高 50.83,比之前幾次跌市大約 30-40 高,但比對 2020 年 3 月 68.64 低;
  • 如果比對恆指一個月波幅,跌得越多的一個月,VHSI 就越高,粗略比較恆生指數一個月正常波幅大約 1500-2000 點,而 VHSI 就維持在 20。如果當月恆指跌幅有 3000-4000 點,VHSI 就大約 30-40。如果跌幅有 5000-6000,VHSI 就會大約上升到 50-60。因為波幅是累計的,恆生指數當月跌幅越大,VHSI 拋物線上升就越大。
  • 以上資料也可引伸到恆生指數跌幅通常以倍數展現,即是 x2,x3,x4。 x2 跌幅大約 3000-4000 點,2020 年 3 月就是 x3 跌幅,2008 年就是 x4 跌幅。今次比較特別是 x2-x3 之間。
  • 所以普通跌幅 VHSI 就上升到大約 30-40,下一級跌幅就去到大約 50,災難級跌幅就上升到 60 以上。
  • 結論係恆生指數每 2-3 年就有一次中長期跌浪,每次跌浪時間最少 9 個月以上,最後一個月也是恐怖式跌浪,最少也要達到 x2 跌幅。所以年初 1 月以為係高低腳,完成上年下跌趨勢係一個嚴重誤判。因此今次奶嘢,係應該的。只是由上年年初判斷中期跌浪開始,差不多減持全部倉位,等足一年,只做短抄,一直也做得不錯,但到最後居然把握不到最後跌浪,感覺非常之不甘心😭。
 
從以上分析 SP 股票期權想做得好,了解波幅是非常重要。好多人如果做期權經歷爆倉,唔知會唔會研究下點解會輸錢?原來爆倉唔係純粹因為股價下跌,因為 delta 關係,期權未入價時虧損反而冇正股咁多,SP 股票期權大幅虧損係因為波幅上升,影響了期權價值。

簡單來說期權價值由三部份組成,價內值、時間值,再加上波幅:
  • 時間值由 SP 那一刻開始就只會下跌,不會再上升;
  • 價內值會隨著正股上升、下跌而變化,股價下跌時,SP 期權的虧損便會擴大。理論上最大虧損也只是相等於正股的價值,所以只要有現金 backup 的倉位,或沒有做槓桿的戶口,理論上最多只是跌到零;
  • 波幅就比較複雜,對於價外、等價或價內期權會有不同的影響。但最重要一刻是由價外跌到等價,因為 SP 期權通常都是做價外,而當股價下跌,期權就會由價外變成等價,再變到價內。
 
用呢個期權計算器,可以計算到波幅對期權價值的影響。

https://www.interactivebrokers.com.hk/cn/trading/options-calculator.php

因為想研究跌市時,入價一刻,波幅對期權價值的影響。所以假設股票正股股價係 $100,行使價係 $100,距離到期天數係 30 天,利率、股息回報率設定為 0,隱含波動率(波幅)係 10%,會得出看跌 Option Price 為 $1.1342。用不同波幅數值可以得出以下結果:

10%    1.1342
20%    2.26817
30%    3.40168
40%    4.53448
50%    5.66636
60%    6.79707
70%    7.92639
80%    9.05409
90%    10.17993
100%  11.3037

大家看到以上的數值有感覺嗎?如果經歷過爆倉的日子,相信就會明白以上數字有多恐怖。雖然我哋學期權時都有聽過 Short 係會輸無限,Long 就輸有限。但通常都唔會在意,尤其是 SP 贏了兩三次之後。

我用 IB 通常只看  Current Available Funds,如果 CAF 跌到零就表示 IB 唔會再比你開新倉,只可以平倉。如果去到 Current Excess Liquidity 跌到零,IB 就會幫你自動斬倉。以我經驗係大跌市,由 CAF 去到 CEL 跌到零,可能只有 1-2 日時間,所以如果 CAF 去到零,而冇對應方法,通常都會爆倉。平常我會保持 CAF 係本金 20%,而 CEL 就會大約係 30%,即係理論上整個倉要跌 30% 才會爆倉。但實際上呢?其實除了波幅,SP 期權另一個虧損風險就係 IB,當跌市時,IB 會隨時更改 margin 要求,變成整個倉冇跌到 30%,但 CEL 就已經變成零。

以今次為例,在跌市初時,戶口 CAF 還有四十萬,去到 2 月 28 日穿了之前的底部,VHSI 開 28.65,就只剩下二十萬,所以我要馬上補二十萬去維持 CAF。到 3 月 7 日恆生指數裂口下跌就要再補,當天 VHSI 上升到大約 35。 3 月 15 日大跌市日 VHSI 爆升超過 50 以上就再一次補倉,即是短短兩個星期帳面上已經輸掉了八十萬,而 VHSI 只是由大約 25 上升一倍到 50。

從以上波幅對期權價值的影響,雖然  SP 係唔會輸無限,但係有機會輸 10 倍以上。如果有本金 100 萬,SP 收期權金 10 萬,當波幅由正常 20 上升一倍到 40,其實虧損已經超過 20 萬,加上價內值虧損,再加上 IB 收緊 margin 要求。三樣虧損加起來,IB 已經要斬倉,不過 IB 也算是好,通常斬倉之後都會淨返 3-5 成不等,不會 total loss😖。

但其實真是輸了麼?基本上這些只是 IB 計算上的結果,尤其是波幅及 IB 收緊 margin。以今次為例,波幅由 3 月 15 日的 50 跌到 3 月 16 日的 40,CAF 已經大幅回升,去到今個星期 VHSI 去返 25,大約又是 2 個星期,就已經由地獄再次折返人間,好似冇事發生過,放入的六十萬已經提取返,CAF 也回升返四十萬。不過如果中間被斬倉,相信冇兩三年時間,都好難追返所有損失。

咁既然 SP 期權風險咁大,值得去學習,去做嗎?如果睇返以上列表,兩次調整低位時間大約是 20-30 個月不等,假設正常市況 SP 期權也可以賺到錢,即是 20 個月以上都賺錢,才需要去準備一次預期中的大跌市,那麼是否值搏就是各人的取向了。

好了,當知道怎樣輸錢,除非嚇怕了,不再玩 SP 期權,又或是覺得 SP 期權風險回報不成比例,都要諗下方法去避免下次再奶嘢,或者應該是積極地為下次跌市作準備,我有以下經驗或者可以參考一下:

1)要了解恆生指數走勢,有危就有機,反過來想,如果在恆生指數下跌趨勢時避免持倉,當跌市尾段才開始建倉,或當爆 IV 時才 SP 期權,對投資回報是否會完全改寫?

2)控制持倉、保持低 margin、不 overtrade 是 number 1 rule,雖然當 SP 持續賺錢,心魔是非常難控制,但這亦是成敗關鍵。

3)margin 我會以自己計算為準,即是如果本金 100 萬,SP 股票期權計算所有接貨總額為 100 萬,margin 就是 1。如果接貨額為 150 萬,margin 就是 1.5。絕不建議 margin 超過 2,因為是非常容易爆倉。今次奶嘢原因之一就是睇錯市, 3 月份把 margin 提高到 2,因為以為 1 月份市況已經見底。現在 4 月份已經把 margin 減回到大約 1.5-1.6。

4)如果用 VHSI 作為指標,可參考當 VHSI around 20,margin 只維持在 1 或以下,因為 VHSI 有隨時上升的風險。反而當 VHSI 上升到 30-40 或恆生指數當月有 x2 跌幅,可以持續加倉到 margin 1.25-1.50 之間。當 VHSI 達到 50,再以當時預備金和 CAF 的情況,可加到 1.50-1.75 之間。

5)要有預備金,預備金就是在之前 SP 持續賺錢的時候累積。好似去年我做 SP 每月持續賺錢,每當賺到本金 10%,我就會提取該筆現金作為預備金,而唔會因為本金增加而持續增加 SP 倉位。因為要預備應對兩三年一次的大跌市,而控制 margin 只可以對應正股下跌期權價內值的虧損。至於波幅增加的虧損及 IB 更改 margin 的風險,只有用硬食去對應。預備金就是當 CAF 大幅下降時用作補倉避免爆倉的方法,worst case 最多把之前賺到的輸返哂。但如果沒有準備,倉位因為賺錢持續增加,最後反而一爆倉就會輸突。以今次經驗,有 50% 本金作為預備金是相對安全,除非達度 2008 年級數的跌市,就多少也沒得救。當然預備金可以作其他投資,不一定是現金,但要肯定該投資物可以馬上變現作緊急使用。3 月份雖然 margin 做錯了,但因為有預備金,所以才避免了爆倉的惡夢。

今次花了很多篇幅去寫波幅的最要性,亦是期權最難了解的一環,反而倉位就冇咩回顧。因為上篇文章已經一再強調,只要可以應對極端市況,投資就會更上一層樓,而波幅就是重中之重。如果可以明瞭其中變化,做 SP 期權就會更加得心應手,股市是提款機再也不是夢了。

如果覺得文章有用或值得支持,就請 like (like 的方法) 多啲啦!謝謝各位!