股壇無忌: 2021

2021年12月18日星期六

100 萬模擬收息組合 (1)

見到 Billy 兄及 James 兄攪了個模擬收息倉，自己也趁下熱鬧攪返個，雖然之前攪過啲倉都係虎頭蛇尾🙄。

不過現實中也是累積緊一個收息組合，是整體資產配置的其中一部份，有機會會分享下，因為還是在摸索階段中。

跟他們有些分別，收息組合沒有開倉日期，因為我不會一次過買入所有股票，只會慢慢累積，而累積夠才算開倉完成。

而且組合也會不時轉換，不會放係到就算。收息組合目標大約十隻，每隻大約十萬，息率要有五厘半之上。

暫時目標如下：

3001 Premia 中國地產美元債 ETF

3110 Horizons 恒生高股息率 ETF

1503 招商局商業房託

2778 冠君產業信託

0173 嘉華國際

0014 希慎興業

0270 粵海投資

0123 越秀地產

0939 建設銀行

1398 工商銀行

收息組合揀股第一個重點就是要揀選的股票希望不會停止派息，好似滙豐銀行有不良的派息記錄或比較週期性的股票就一定不會揀選；
因此如果 ETF 有高息率，某程度係比個股更優勝的選擇，因為不派息的機會相對較低，所以就揀了 3001，3110；
另一個必定揀選的類別一定是 Reits，因為派息比率有保證。揀 1503 是因為下年還有保證派息，而且有 10 厘以上，就算不計保證派息，現價也有 8 厘，應該是港股 Reits 當中比較高息率。至於 2778 純粹近期價格下跌，所以買入，當然 0345、0808、0778 應該比他更好；
以上例止引申了擇選收息股的第二個重點，就是盡量避免買入的股票賺息蝕價。因為買入價會影響整個組合的回報，如果賺息蝕價其實只是阿 Q 的想法去安慰自己帳面上的損失。而且偏低價買入，持倉及加注的信心會更大；
香港地產股是 Reits 的另一類選擇，又其是好多香港地產發展商近年租金收入的比重越來越大，而派息也見到越來越穩定，0173，0014 都係抄 Billy 兄的；
0270，0123 是因為恆大事件風險化解委員會有這兩間公司，最少佢哋應該係唔會出事個批，但有冇著數就唔知道；
最後就是內銀，都冇咩原因，息率高、低市盈率、穩陣、波幅不太大，股價跌到多年波幅下限，現價買入用來收息，贏面好高，不過最衰要收股息稅。

組合好像側重了係地產版塊，始終租金收入是比較穩定，其餘行業週期性比較高，未必一定可以維持派息，中伏機會較大。其他公用股息率只有 3-4 厘，我就覺得不太吸引。

全部買入之後再分享買入價及息率。

如果覺得文章有用或值得支持，就請 like (like 的方法) 多啲啦！謝謝各位！

2021年12月5日星期日

股市參與者普遍都患上失憶症

今年中港股市下跌，無論散戶、財演大叫放棄港股或大吹港股已死的大有人在。除了之前提過的黃x英，最近看到了胡x青文章港股已死？，雖然文章已經是上個月初，不過經過今個月，相信佢嘅諗法會更堅定🤪。

但事實呢？其實只要攞幅圖嚟睇下（我都幾懷疑佢哋有冇睇圖🙄），港股是否已死已經有答案。

通常睇港股都係睇恆生指數或者 2800 盈富基金，今次就睇下啲鬼佬嘢，因為今次中國一連串收緊市場動作，連好多鬼佬都媽媽聲，例如索羅斯，咁佢哋係唔係都集體失憶呢？

MCHI 年線圖

以上圖表是 MCHI ETF 追蹤 MSCI 中國指數，看看 10 大持股：

00700 騰訊控股 13.30%

09988 阿里巴巴-W 11.00%

03690 美團-W 5.31%

JD 京東 2.59%

00939 建設銀行 2.31%

NIO 蔚來汽車 1.94%

02269 藥明生物 1.84%

02318 中國平安 1.68%

NTES 網易 1.62%

BIDU 百度 1.61%

雖然叫中國指數，但頭十大科技股已經佔去持股 37.37%，不過都反影了科技行業近年佔了中國經濟一大比重。

雖然 ETF 只有 12 年歷史，只看陰燭由年頭跌到年尾的有 5 年，由年頭升到年尾的陽燭也是 5 年，但 10 年下來，ETF 也是持續上升。你話胡x青跟黃x英係唔係有失憶症，中國股市或者港股 10 多年以來的走勢也是急升、急跌。到下次港股急升的時間，他們多數又失憶，口中又變成 GoGoGo 了。但我哋作為散戶，甘心情願被市場、新聞、財演牽著走嗎？或是認清楚市場的走向，配合市場走勢進、出，去增加自己的投資回報？

除了 MCHI，FXI ETF 是另一隻 ETF 主要持有中國大盤股。因為持股比較平均，可能更能反影中國經濟，十大持股包括：

03690 美團-W 9.92%

00700 騰訊控股 9.00%

09988 阿里巴巴-W 7.44%

00939 建設銀行 5.90%

09618 京東集團-SW 5.37%

02318 中國平安 4.14%

02269 藥明生物 4.12%

01398 工商銀行 4.10%

09888 百度集團-SW 4.01%

09999 網易-S 3.35%

FXI 年線圖

以上圖表是沒有復權，可以更加容易看到每年股價變化，10 多年來股價差不多是一年升一年跌，雖然也是上升，但上升幅度其實只是輕微。如果唔係失憶，長期在一個年升年跌的市場，會唔知道嗎？還會有港股已死的言論嗎？

至於漠視市場走勢；又唔睇圖去了解歷史波幅；喜歡只聽消息 GoGoGo 的時候就進場；死死死的時候就退場的大部份散戶，除了佢哋自己，還有什麼可以幫到佢哋？

當然如果你不喜歡這種走勢，認為美股更好，離開絕對是更好的選擇。但想係呢度食，又係呢度瀨嘅人，其實才是最可悲！

如果覺得文章有用或值得支持，就請 like (like 的方法) 多啲啦！謝謝各位！

2021年11月30日星期二

恆生指數 2021 年波幅預計更新

年初 2月27日寫的文章恆生指數 2021 年波幅預計分析，跟上兩次寫恆指波幅恆生指數高低重要嗎？及恆生指數 2020 年波幅預計分析一樣，一寫大市就由頭跌到尾，今次又係跌了五千幾點，但見底未就未知？還有以時間計調整了 9 個多月，基本上也滿足了大約 9-12 個月的調整期。

上一篇文章預計今年年波幅也是 8000 點，以年初高位 31183 點計算，跌 8000 點即是 23183 點。恆生指數今日最低位 23175 點，跟預計只差 8 點，但是否已經見了全年低位就不知道了。

不過有一點可以肯定現在買入股票，中長期回報、值博率一定比在 28000 點以上 GoGoGo 買入的高。但今日有多少人是 GoGoGo 地入貨？我今日就買到冇停手，你呢？

恆生指數一年日線圖

如果覺得文章有用或值得支持，就請 like (like 的方法) 多啲啦！謝謝各位！

2021年11月16日星期二

兩種對港股的態度

今日係貓奴到睇到兩篇文章，忍唔住要講兩句：

黃國英: 卸下包袱覓新戰場邊學邊炒

【佛系股評】專家不告訴你的估值方法

其實我真係唔明點解仲有咁多人信黃x英？作為一個基金經理，不斷踩低一個市場對基金回報有幫助嗎？或是只是不斷寫文章去催眠自己 or 比啲理由客戶睇，去掩飾跑唔到數嘅藉口？

看看彿系男寫 “有另一位專家，近期頻頻唱衰港股，在大眾媒體宣揚轉場美股搵真銀。這個說法非常迎合大眾口味，但其實網上跨境券商盛行，不用你吹捧都已經大把人在炒買美股。本欄亦多次論述「港姐」特別黐線，但仍然堅守這個市場，當然唔係因為「愛」，而係佢全球估值最低，亦是歷史上鮮有的低位！將投資期限稍為拉長三至七年，回報未必最高，但可靠性及持續性一定優於明顯地貴的市場。”

其實就帶出一個信息，前者雖然炒股經驗豐富，但跟本就是“學藝未精”或者學壞師。雖然每個市場也有不同特性，如果一套投資手法係有用，只雖要微調就應該生存到。如果方法只適用於某一個市場，某一段時間才賺到錢，這套方法都不太值得學習。

最近發現了一隻港股 ETF 幾年回報比黃x英更好，那麼為何要幫襯佢，比佢搵老襯？

如果覺得文章有用或值得支持，就請 like (like 的方法) 多啲啦！謝謝各位！

2021年11月13日星期六

3001 PP中地美債

見到 B兄介紹 3001 PP中地美債 https://richman1958.blogspot.com/2021/11/blog-post_50.html，才知道原來有這一股 ETF。

本來有各種 ETF 可以投資是好事，由其是債券類對散戶來說比較難入場。不過這股 ETF 是在今年四月份才上市，那時內房債還未出事。原來大戶又係推出啲“合時”產品搵散戶老襯，好在唔係有好多人識，應該冇咩人奶嘢。

3001 PP中地美債日線圖

上市第一日開 $388.70，今個星期最低跌到 $245.05，跌了 37%。中間雖然收了 2 次息共 $11.82 都幫補唔到幾多。

如果以後派息跟上次所派大約 $5.60 差不多，一年派 4 次息，現價 $287.30，息率大約 7.8 厘，其實也是不錯的收息選擇。因為理論上 ETF 係必定會派息，唔同股票要看大股東心情，又或者一話生意唔好就停派息，失哂預算。不過大前提當然係內房唔會爆煲，敢唔敢落注就決定於信唔信亞爺。呢隻 ETF 成交唔多，觀察了一個星期，買賣差價都好闊，不過見到富途、盈透牌都係一百一百咁買，散戶真係好多都好有米🤪。

多得 B兄，暫時低位撈咗少少，賺到幾餐晏仔。債券理論上票面值到期日都會變返一百，只要唔違約。所以低位買了理論上都會升翻，但要估邊隻內房唔違約可能有啲難度，所以大包圍的 ETF 可能係其中之一個選擇。

看看 3001 PP中地美債十大持倉，會爆煲的應該唔會有幾多間掛🙄。

十大持倉（發行人集團）

截至 2021年11月11日

旭輝控股集團 4.38%

融創中國控股 4.24%

萬科集團 4.07%

廣州富力地產 4.07%

路勁基建 3.99%

碧桂園地產集團 3.97%

廣州越秀集團 3.94%

世茂集團 3.85%

仁恒置地集團 3.73%

時代中國控股 3.71%

所以今次想擺下收下息，睇下一兩年後係唔係真係升翻，到時再話比大家知結果如何？

如果覺得文章有用或值得支持，就請 like (like 的方法) 多啲啦！謝謝各位！

2021年10月31日星期日

兩種投資理念

有些人的投資理念是不怕輸十次贏一次就夠，只要輸的那十次可以控制，但贏一次就可以翻身。黃xx就最喜歡吹捧這種理念，而且一舖翻身講出嚟幾 sexy。所以通常你聽到的故事就是那一次，加上同好會圍爐講佢哋硏究了幾多幾多才一注獨贏，但係如果咁識得研究，為何又買入那十次🤔？當然其餘那十次就不會再提，也是有道理的，止蝕了還提來做什麼🙄。

另一種理念是保持高機率贏面，要有七成之上，有機會才出手，不會一舖發達，而且一但犯錯，有機會輸鑊金，但長期因為勝率高，最終也有不錯回報，不過就冇咩 talking point，好似乜 Sir 衰一次就比人插到爆。而且要建立到自己嘅系統，付出、堅持加運氣比研究更重要。

究竟那一種理念更像賭博，那一種才是真正投資？如果投資好以做生意，有冇人抱著前者的心態去做生意而長期成功？不過近年好像前者不斷被追捧，後者反而被人唾棄。

其實香港人一直是炒炒賣賣起家，一舖發達是大多人的夢想（我都想😅），成王敗寇也是用金錢衡量，但也不用貶低他人來抬高自己。

（以上是近期看了多篇文章有感而發）

2021年9月3日星期五

7226 ＸＬ二南方恒科半年操作總結

近排冇咩寫 blog，因為每日做運動、拉筋花了頗多時間。當然正股、期權操作日日有，但都係之前講個啲，所以冇咩好寫。

由之前三月份文章跌市的選擇 7226 ＸＬ二南方恒科開始 trade 7226 已經差不多半年，得唔得都應該做個總結。

7226 ＸＬ二南方恒科日線圖

看看股價圖，估唔到三月份跌到 7 蚊，調整了 48% 以為都幾平，半年下來，居然再跌多一半到三個幾，由高位跌了 75%。正常買入一隻股票，股價跌了 50%，通常都兇多吉少，但今次結果呢？

7226 ＸＬ二南方恒科買賣打點

Details 就唔講但看看以上富途的買賣打點，都知 trade 咗無數咁多次。以銀碼計我擺咗 40 萬係個倉到，不過每一 round 大約只買了 20 萬，最多一次也不超過 30 萬，半年下來大約做了 5-6 個 round，居然有 20% 大約八萬蚊盈利，結果真是有些驚訝，因為操作上其實好求其，實驗中冇咩將法。

策略其實在之前文章講咗第一 round 險勝，第二 round 全勝，第三 round 小勝，只是跌市買入、升市賣出，就係咁簡單。因為五、六月怕五窮六絕停咗買賣，如果以同樣方法操作，可能會達到半年有 25% 回報以上。

以今年來說暫時市況由頭跌到尾，也可以做到正回報，相信升市會更容易做到，那麼我係唔係終於發現了 Holy Grail🤔？即係傳說中投資界的操盤必勝法。

除了 7226，其他正股、期權，還有一隻千年美股蟹貨返生咗，今年到現在為止投資回報超過了 35%。是否進一步引證了我的想法：「長揸冇運行，短炒有淡食！」的投資策略才是長期可以達到回報的正確方法。這一年的改變對比之前可以說是「自信心返咗埋嚟，個人明顯高咗，大只咗！」😅

暫時總結係：

集中持股，只 trade 熟悉的股票(有期權的)，唔殘唔買；
拒絕跟市場跟紅頂白，去買入自己不熟悉的股票或熱門股；
跟據自己的判斷、節奏，不受他人影響，睇少啲其他人評論；
長期維持高現金比例，有機會才出手；
堅持有糊就食，不貪心，持續就是正回報。

當然只是九個月時間，還有好長的路要走，睇下點！

如果覺得文章有用或值得支持，就請 like (like 的方法) 多啲啦！謝謝各位！

2021年7月27日星期二

跌市中 VHSI 的啟示

這兩天終於迎來期待已久的大市調整，之前三篇文章

從人民幣匯價看恆生指數下半年走勢

近期大量股份配股及大股東減持的啟示

大市成交額對後市的啟示

又一次証明歷史是不斷重演，最少香港市場是這樣，不過人民幣暫時沒有大幅走低，今次恆指會唔會回調冇咁深？

而且又再確立近年來的見解，香港股票抄波幅比長揸回報更好，如果之前在高位忍不住入市，無論入咗咩股，都唔知幾時才可返家鄉？反之如果之前輕倉，現在就可以慢慢入市，就算現水平入市，後市再跌，中長期贏面一定比之前高。

以年初文章恆生指數 2021 年波幅預計分析估計如果今年有 8000 點波幅，以今年高位 31183 點計算目標 23183 點。今日恆生指數最低 24748 點，距離高位跌了 6435 點，調整是否足夠就很難說。但現水平入一注，跌到 24000 再入一注，到 23000 入最後一注，應該是不錯的策略。

有很多人問，怎樣可以長期在股市中贏錢？多數的答案會是說緊抱住優質股，長期就會帶來可觀回報。但第一怎樣界定優質股，好多人也只是馬後炮，要現在找到十年後的優質股真是那麼容易嗎？

我反而覺得只要避開瘋癲的市況，在合理估值之下建倉，其實買入不太差的股票，長期已經可以帶來不錯的回報。因此買入時機其實比買入什麼股票更重要。記住股票市場只有兩成人賺錢，跟住大多數人的策略，通常都冇運行。

VHSI 恆指波幅指數月線圖

那麼怎樣才是好的時機？以上是 VHSI 恆指波幅指數 9 年月線圖，可以見到大部份時間也是在大約 13-28 之間徘徊。在中期跌市當中 VHSI 沒有爆升就表示還未是時候建倉，因為還未跌夠，但當 VHSI 超過 28，應該就是跌市最恐怖的時候，也是建倉的開始。

建倉的策略就因應投資者的性格而定，好似我喜歡接飛刀，現在就是慢慢建倉的時機。對於穩陣派，可以等多兩、三個月，因為跌市之後通常也會有兩、三個月在低位徘徊，到時慢慢吸納心儀的股票也未遲，中長期回報必定可觀。

還有像我這些喜歡做遠權的投資者，這幾日做下年到期的期權，期權金相對吸引。今日 VHSI 最高 36.49，相信今次不會像 2020 年不斷爆升，只要控制好 margin 不要 over trade，問題應該不大。下年食粥食飯，就看今次開到幾多倉位😅。

如果覺得文章有用或值得支持，就請 like (like 的方法) 多啲啦！謝謝各位！

2021年7月6日星期二

1093 石藥集團 - 機會又來了

估唔到 5 月 26 日出文 1093 石藥集團 - 中線操作完成清倉 1093 石藥集團，個零月咁快就有機會入返。

而且令到我更堅定上次的見解，就是等機會比長期持有會有更好的回報，如果上次冇清倉，今年盈利就大縮水。不過這當然只適用于這幾年的港股，美股就完全是第二個世界。

1093 石藥集團 1年日線圖

股價不知不覺間又跌返去之前 $9.0-10.0 模行區，有可能又在這區間上落。

通常有期權的股票，機會來到都是先做期權，不過最近 IV 偏低，期權金不太吸引。不過今次 1093 石藥集團期權金居然幾好，因為之前股價上升帶動了 IV 上升。

現價大約 $9.83，如果做下年 2022 年 6 月遠權，行使價 $9.25，即距離現價 6%，SP 期權金大約 $1.05，即是大約一年時間有 11.3% 回報。如果接貨，接貨價 $8.20，距離現價大約 16.5%，距離今年低位 $7.70 差距 6.5%。斷估都唔會跌穿低位啩，輸的機率應該不大。

而且這只是第一注，再跌再加，一貫做法。

如果覺得文章有用或值得支持，就請 like (like 的方法) 多啲啦！謝謝各位！

2021年6月21日星期一

2601 中國太保 - 一年一次的買入機會

以上一篇文章 1336 新華保險 - 賺餐晏仔的機會，無論是讀者回覆或閱覽數也是近期文章偏低之一，再加上之前分析內險股的文章，也表明看這 blog 的讀者好像對內險股不大有興趣。而看看其他 blogger 也好像沒有那一個對內險股有投資興趣，為何會這樣呢？內險股真的沒有投資價值嗎？

反而我自己幾乎每年也會買賣內險股，而且多年下來差不多每次也是賺錢的。

首先看看一般人怎樣投資，相信無論是生手或老手，每年也會看看一些基金經理或投資高手對新一年有那個板塊值得投資而去選擇今年想投資的股票。這種從上而下的投資方法或選股方法，好像不知不覺成為大部份股票投資者的必然選擇，而且沒有什麼人會質疑這一種方法。

當然我最初的投資生涯也是按照這種模式進行，而成績當然也跟大部份散戶一樣，輸多贏少。我不知道有多少人會反醒究竟問題出在哪裏？或是輸了就算，新一年又再重新揀選另一批股票，希望今次可以把輸的賺回來。幾年之後我漸漸發覺這方法有幾個問題如下：

第一是一個投資組合裏，一年下來總有些是升，有些是跌，拉勻可否賺錢其實取決於當年市況，多於選股；
第二是止蝕的問題，除非一買入股票就上升，如果買入之後下跌都要面對止蝕的考驗。每年大市也會有一定波幅，大市只有由頭升到尾的一年最易賺錢，其餘無論是一年來下跌市況、先跌後升、先升後跌，股票上上落落是不容易處理。結果是持有的股票止蝕的機率非常之高，當不斷的止蝕發生，又怎會賺到錢。而妄想可以在每年的低位買入股票，基本上是不可能；
第三亦是整個策略最大的盲點，這一種投資組合、選股方式原來令到我們在不知不覺之中每年也投資了大量我們自己不熟悉的股票、公司或行業當中。有些人總以為睇咗一些評論、睇咗業績，計下數就以為對公司狀況非常清楚了解。又其是一些新興行業，當投資了不太了解的行業，而波幅來到就會產生信心、止蝕問題。這樣持續的投資，回報又怎會好。

正所謂無論是黑猫或白猫，只要捉到老鼠就是好猫。投資也是一樣，最終目標就是帶來資本增值，所以只要可以帶來回報的就是好股。因此我們跟本不需要每一年也揀選一堆股票，只要有幾隻熟悉的股票，其實已經足夠。而內險股就是其中之一員，2601 中國太保更是暫時內險股中最好的股票。所講的好不是公司基本因素，而是每年的波幅走勢，只要在偏低時買入，基本上贏面非常之高。

2601 中國太保月線圖

看看 2601 中國太保上市以來的月線圖，除了去年因為 Covid-19 超跌，股價一直在趨勢線上上升，但中間波幅驚人，最近的大跌又去返接近趨勢線底部。

以上是記錄 2601 中國太保由 2009 年上市以來每年未除淨的高低位，有以下幾點可以注意：

第一點最重要就是如果每年在低位買入，第二年一定賺錢，升幅由 27.5-138.8% 不等，平均 60.7%；
除了 2011 及 2020 年外，歷年低位都是大約 20 幾蚊，而高位除了 2011 年只有 $29，所有歷年高位也是超過 30 蚊以上，更有幾年達到 40 蚊以上；
即是如果在貼近 20 蚊入市，第二年就可以在 30 蚊以上賣出，投資就係咁簡單🤔。

而這樣的走勢其實是有基本因素支持，通常一間公司的價值可以簡單從資產多少來決定，而最有價值的資產就是現金、磚頭、金融產品。保險公司資產主要是金融產品，但有別於銀行會有壞帳，保險公司多數持有債券為資產，相對比銀行更安全。只要公司的內涵價值每年提升，股價一時的下跌，就是機會，因為股價最終一定會反影返公司的價值。還有只要每年保費增加，現金流持續，基本上從來沒有保險公司會執笠，或者經營有什麼問題，因此造就了內險股是最穩陣的投資對象之一。

暫時是每年也賺硬的投資，以第一季業績，相信今年內涵值不會減少，而暫時每月保單也是增長中。這種賺硬的投資，你敢 all in 嗎？雖然我投資了多年，但我也不敢😅，今次可能用 1/3 啦！

如果覺得文章有用或值得支持，就請 like (like 的方法) 多啲啦！謝謝各位！

2021年6月15日星期二

1336 新華保險 - 賺餐晏仔的機會

雖然仍然等待大市調整，但有機會也是會入市希望賺返啲生活費。上兩個星期的 0270 粵海投資、0688 中國海外，暫時又賺咗幾餐晏仔，未清倉，繼續高估低揸，執到幾多得幾多。

1336 新華保險 1年日線圖

今日新加入的是 1336 新華保險，之前三月份出業績時已經做了一些期權、正股，執了幾轉，因為股價這幾個月也只是在 $28.5-30.5 之間上落，不過這兩天終於跌穿 $28.5，正常來說應該等跌定才買。不過因為除淨在 7 月 8 日，派息 $1.65，現價大約 $27.3，息率差不多 6 厘，以保險股，算是非常高息，所以現在買入等收息也不錯。

跟一貫的做法，每跌一蚊加一注，加到反彈再算。如果跌得不深就高沽低揸，如果跌得好深就跟之前 9888 百度集團-SW 的處理方法，先清倉再等，總之但求不損本金為目標。當然這樣操作前提要好了解買入的股票基本價值，如果是二三線炒股就不適用。

今次不用期權，只入正股，原因近期大市波幅細，期權金不太吸引。還有除淨之後股價會調整，雖然期權金已經相對反影了當中因素，但還是等除淨後才考慮。

上圖加咗 KDJ 指標，J 線穿了 0 線，之後開始向上，而且跟股價已經背馳，叫做多一個根據。

如果以坊間一般技術分析，穿了長期區期，即所謂的突破，普遍認為向上就要追，向下就要止蝕，為何我的操作總是背道而馳。不過不知道有多少人跟據這些財演式看圖方法而可以長期贏錢呢？

2018 瑞聲科技 1年日線圖

以上是近期的一個例子 2018 瑞聲科技，之前股價在 $40.0-47.0 之間徘徊，看看在 C 區，因為出了個普普通通的業績，股價向下突破，但結果呢？

同樣看看再之前的 A、B 區，以為股價突破向上，但結果呢？

當然以上例子不是絕對，有很多強勢股突破之後會按突破方向繼續走，但要怎樣分辦呢？

我自己就寧願當股價在區間徘徊的時候高沽低揸，如果穿了區間就按照上次 9888 百度集團-SW 的處理方法，只要股價在區間的時候操作賺到盈利，就會有本錢處理之後的損失。但如果每次只等突破，而突破失敗就止蝕，本金只有不斷消耗，好難追回。

不過今次 1336 新華保險跟 2018 瑞聲科技其實不可以相比，因為 2018 瑞聲科技在低位徘徊多時，而 1336 新華保險是在高位徘徊，所以今次只適合反彈就埋單，賺餐晏仔就算。

如果覺得文章有用或值得支持，就請 like (like 的方法) 多啲啦！謝謝各位！

2021年5月31日星期一

0270 粤海投資 - 手痕忍唔住買入

見 James兄組合每週快噏 (4) (2021.05.28 -- 第103日) 買入 0270 粤海投資，自己後知後覺，星期六望下望下，今日忍唔住買返注先。

這一股票以前買賣過幾次也是賺錢的，始終買賣股票有賭博成分，所以也是偏偏地的行為。運氣、風水等等唔好盡信，但也不可不信。從經驗知道通常以前賺到錢的股票，買賣再賺到錢的機率係大啲，唔到你唔信。如果用科學啲嘅講法就係呢啲股莊家操作跟自己的買賣操作相類似，所以比較容易足到路。如果再以能力圈解釋，買賣熟悉的股票，當然比買入一隻陌生的股票，贏面更高。

如果要睇估值，可以睇睇佢數簿兄 [問問題] 有網友問 0270 粵海估值，用息率計，現價大約 $11.44，全年派息 $0.5894，大約 5.15厘，在估值偏高位置，即是抵買。而且 6 月 24 日除淨派 $0.413，然後 9 月會再派息，如果現在買入之後股價再跌，也可以收下息等下，好過 9 月之後買要等 9 個月才收到息。

0270 粤海投資 5年週線圖

用五年週線圖，從技術分析看看買入原因：

股價已經跌倒上兩次低位的支持位，大約 $11.0；
下一支持位在 $10.0，就算股價再跌，跌下去繼續溝貨，只要一反彈就可減倉再看;
上次提過用 KDJ 指標，今次就試下。通常指標週線會比日線準。五年來 J 線跌到 0 以下有 6 次，只有 2016 年 11 月那次，股價之後再跌 (不過之後都升返)，其餘全部中線也有反彈；
最後上星期無端端大成交，好似係 MSCI 調整。又唔知係唔係因為 30億港元之有限期貸款融資及根據《上市規則》第13.18條披露資料，市場一些對沖盤，但無論如何股價跌跌下，大成交都係好事。

所以雖然股價未大平賣，但又手痕，因此買入博一博。

五窮六絕五月沒有窮，之前預計市況向下從人民幣匯價看恆生指數下半年走勢沒有發生，由其是人民幣匯價持續創新高，不過今日看見一篇新聞人行主管報紙:未來可能推動人幣貶值的四大因素不能忽視。根據以往的經驗，亞爺自有自己一套看法或想達到的目的，市場的升跌好像從不是考慮，更不要低估亞爺做不到，所以暫時只有維持原判，繼續等。

如果覺得文章有用或值得支持，就請 like (like 的方法) 多啲啦！謝謝各位！

2021年5月26日星期三

1093 石藥集團 - 中線操作完成

其實這一篇文章沒有什麼好寫，我只是想留下一個記錄。因為之前寫個股多數是把已經入市或想入市的理據記錄，但今次是記錄今日已經把 1093 石藥集團全部倉位清掉。

1093 石藥集團 1年日線圖

之前在 2020 年 8 至 12 月期間，1093 石藥集團跟隨大市股價不斷下跌，最低跌到 $7.08。雖然業績持續增長，但因為帶量採購市場不太看好，所以股價持續低迷。我由 $8.11 開始每隔 $0.1 就買入一注，有時兩注，直到最後 $7.11，買入了大約全部資金 1/4，平均價大約 $7.7。差不多 6 個月時間，昨日股價升到 $11.9，由低位上升了 68%。

期間還有賣買期權、短炒，今日把最後一注賣出，總回報大約有 30%。如果以 68% 升幅，其實表明中間操作只是麻麻，有很多次短、中期高位賣出，但因為信心問題，沒有在回調補回，所以盈利不是太突出。

不過這樣的操作又再令我思考究竟投資股票有沒有長揸的必要，通常長期每年有 15% 回報其實已經是神級操作，強如英 sir，都係咁上下。究竟一年到晚都有股票係手會容易達標，定係吉倉等機會，然後博一舖容易？

以今次計算雖然只有 30% 利潤，如果以 1/4 資金計算，6 個月帶給總資金 7.5% 回報。同期除了 1093 石藥集團，還用了 1/3 資金買入 0688 中國海外，暫時回報大約是 25%，即是帶給總資金 8% 回報。只是兩次操作，6 個月已經達到一年的目標 15%。如果今日清倉 0688 中國海外，今年已經可以休息，還未計這半年的短炒、期權收入。反而如果 0688 中國海外再下跌，可能今年回報就打了折扣，其實相對之前高位，已經打了折。

買入以上兩隻股票其實都是同一套路，企業基本質素好，但因為市場消息或某些非公司基本因素原因 (1093 石藥集團-帶量採購、0688 中國海外-美國制裁)，令到股價持續下跌。係股市打滾得耐，都知道這些沽壓是短暫，中長期股價一定回升。而這些機會基本上每年也有發生，只要有耐性，機會來到馬上把握就可以了。

我會持續這種操作方式一段時間，看看是否真的比長揸股票好。近期合符這種套路的就有 9888 百度集團-SW，唔知還有冇機會買返呢？

如果覺得文章有用或值得支持，就請 like (like 的方法) 多啲啦！謝謝各位！

2021年5月17日星期一

9888 百度集團 - 逆境時的處理方法

相信大家也有經驗，有時以為已經在低位買入一隻股票，點知一買入就跌，而且係不斷咁跌，不知道各位怎樣處理？最多財演戴頭盔的講法就是買入之前先定止蝕價，到位便要執行。聽落好像是好科學化的策略，但很想知道有多少人實行這方法而長期可以獲利？當然更多的經驗是止蝕了之後股價就反彈，最終更可能當時就是一個中長期底位。不過更可能是當你沒有止蝕的那一次，就是惡夢開始，股價之後長跌不起，最終變成牆紙。那麼這些人生交叉點，究竟點樣處理才是最適當？但既然是人生交叉點，當然每個人的處理手法會不同，以下只是分享我自己的做法，希望可以給大家作一個參考。

9888 百度集團日線圖

話說之前大約 $205 買入 9888 百度集團，在 26/4 大約 $215 賺了一轉。之後股價再度下跌在 4/5 大約 $201 再買回，當時有幾點技術性考量：

之前兩次到大約 $200 就反彈，表示有支持；
通常整數位都有支持，可以一博；
之前已經有 $10 元利潤，如果 $201 買入，成本只是 $191，更可一守；
技術上用保力加通道，當時通道貌似收窄，即是股價有可能在窄幅上落。

這樣的機會，贏面應該頗高，結果呢？

9888 百度集團日線圖

A 是買入點，結果一買入就連跌五個交易日，最低股價跌到 $170.6，虧損大約 15%。

當然我沒有坐以待斃，其實在 $201 買入只是第一注，買入之前已經預定每差五元再買入一注。最終在 B 區大約在 $195、$190、$185、$180、$175 再買入了五注，$170 那注 set 得太貼，所以差 $0.4 入不到。六注平均成本連手續費大約 $188。我承認看著連續五天下跌，心理壓力是很大，但我用這些走位方法已經很多年，所以要做的只是 set 盤，等成交，再記錄，最終只是一堆數字。

今次是比較好彩，當然投資彩數很重要，但實際操作也很重要由其是在逆境中。五日下跌之後迎來了反彈，12/5 在 C 大約 $185 全部沽出，最終輸了大約 $3。

之後到了 E 區二日內，大約在 $178、$176、$174 再買入全數六注，平均成本 $177。再買入原因第一要追反條數，第二 11/5 當日低位 $170.6 陰陽燭收針，所以 $170 有機會是短期低位，因此只要股價貼近 $170 就是買入機會。

最後今日開市後大約 $184 全清，最終反敗為勝。如果中段沒有操作，現在還是虧損中。

之前文章也提過多次這樣的走位方法，有網友覺得很困難，其實都只是簡單的高賣低買。還有時常看見有些文章總說股價短線難以捉摸，所以長線投資才是王道。但我的經驗是不斷止蝕回報一定不會好，因為要贏返更多才可以獲利。而看著持股不斷下跌而什麼也不做，只幻想股價可以最終返家鄉也不是我可以忍耐。與其係咁點解唔去嘗試下拉低成本，雖然未必每次也成功，但做任何事也是熟能生巧，慢慢就會找到方法，而減少虧損正是增加回報的最佳方法。

還有見到一些文章總是悔恨沽貨之後股價再升，那麼如果今次急急清倉之後再升怎麼辦？中國有句成語 "賣仔莫摸頭"，其實賭場逢星期一至五都開，每日也有爆升的股票，過去了就係過去，仲諗嚟做乜，不如諗下聽日去邊到食飯好過啦🙄！

如果覺得文章有用或值得支持，就請 like (like 的方法) 多啲啦！謝謝各位！

2021年5月10日星期一

第三 round 小勝

估唔到兩個月可以做到三個 round，都是因為上落市的關係。今次又是 7226 ＸＬ二南方恒科主打，其實這篇文章應該 4 月尾寫，因為在 4 月 27 日報導 3690 美團被監管機構調查，怕科指會受影響，所以開市就已經全部清倉。不過想平埋其他正股、期權才總結，所以拖到今日才回顧。

7226 ＸＬ二南方恒科日線圖

今次賺到其實有些僥倖成分，在 A 區兩日買入，純粹因為連續跌了三四日所以博下反彈。而在 B 區全走只因為是 3690 美團的消息，現在看是不錯的操作，但本來今個浪底比上個浪底高，所以預期會破之前頂位才沽貨。

另一個原因今個浪調整不深，所以只買入了上次的一半注碼，而盈利也只有一半，所以想高些價才沽。不過最後不似預期，只有清倉再看，當小勝算了。

這幾日 7226 ＸＬ二南方恒科不斷下跌，如果以以上 concept 應該要入下又博反彈，不過正如之前三篇文章

自己對後市比較看淡，所以今個月應該會休戰，直到過了五窮六絕，再看看怎樣。雖然預期就算市況下跌，也不會一下到尾，中間會有返彈，但怕自己走唔切，而且還有一些正股、期權要走，以確保到時分注撈底時，有足夠現金。

VHSI 1年日線圖

不過暫時好奇怪 VHSI 還是在低位徘徊，今日跌市也沒有上升，又不太似今個月會跌好多🤔。

除了 7226 ＸＬ二南方恒科，上一個 round 有些淨下的正股、期權已經全部平倉，加埋都夠一個月使費，不再細表。至於今個 round 博業績 2601 中國太保，正股贏咗個午餐，期權重博緊，但一彈就會走。又再入了 2238 廣汽集團正股、期權，暫時盈利中，等機會平倉。

最不知道怎樣處理就是 9888 百度集團，之前彈到 $218 走了一轉，但大約 $200 再入返，現價計埋上次盈利輸少少。上次爆完倉，今次是木頭姐走貨，照計沽壓只是暫時，應該越跌越買，但又怕大市下跌會跌得更深。不過加注就一定，反彈再減拉低成本，還有 5 月18 日出業績，看了再算。

今次賺得少，估唔到個翅都差咗，呢間以前食過幾好，今次份量少了好多，冇下次。

如果覺得文章有用或值得支持，就請 like (like 的方法) 多啲啦！謝謝各位！

2021年5月5日星期三

大市成交額對後市的啟示

這幾日大市下跌，留意到很多新聞總是用大市成交額來判斷後市去向。

恒指收挫367點失百天線成交不足千億

基本論調是雖然是跌市，但成交額不大，所以後市不需要太擔心。上篇文章也說傳媒總是有意無意帶風向去淡化跌市訊號，而多年來的經驗反而是反向指標，只是當散戶聽到這些比較自癒的文章，又相當受落。關於大市成交，普遍認知係升市成交大，對後市利好，跌市成交大，對後市利淡，但事實又是否這樣？

在貓奴兄 blog 睇到英 sir 文章

監管新規不宜拖釐清玩法振股市

"踏入「五窮月」，第一個交易日先捱一掌，不過成交偏低加上宰殺牛證加速跌勢，未必可以太作準。暫時策略守住核心持倉，捱打就算，包拗頸一路跌一路加的話，心理壓力太大，萬一跌幅稍為超出預期，隨時打亂部署。 "

連英 Sir 都咁講，應該錯不了😐！

看看以上恒生指數月線圖由 2003 年到現在，先看 A 區 2003 年沙士之後，那時的成交低迷，開始上升的時間成交才少量增加。直到 B 區的時候，2007 年大市成交才大幅上升，跟我哋認知成交大增後市向好相違背。反而是升市初期成交不大，升市後期才成交大。

到 C 區 2008 年金融海嘯，跌市初期成交從來沒有超過升市時的成交，之後幾次跌市也是成交不會超過升市的時候，所以傳統智慧話跌市成交不大就以為後市不會太差是一個完全錯誤的觀念。

去到 D 區跌市尾段，成交越來越少，之後回升成交才慢慢增加。但要注意增加的幅度只是很少，例如跌市時成交五百億，而升市初期成交可能是六七百億，如果傳媒冇報導，相信大部份人也不會留意。

至於 E 及 F 區，那次是歐債問題，最高位的那兩三個月成交也是比之前大，但沒有 2008 年那次成交那麼大，因此跌幅也不算是核彈級。而跌市初期成交也是少過之前的升市，到跌市後期成交又慢慢萎縮。

到 G 區 2015 年大時代，個個以為一個月勁升又成交配合，發達囉！後市一定 go go go，好似唔知邊個話會四萬點，那時傳媒一樣話跌市成交不大，不用怕，結果呢？去到跌市尾聲又是成交大縮，而升市初期成交又係很難察覺的只是多少少。

當升市由大約 18000 升到 26000 去到 H 區傳媒又開始吹風，最後幾個月升市，成交才放量，那次結果又是歷史不斷地重演。不過那次跌市跟之前有些不同，可能因為疫情，所以調整時間比之前跌市長，而且最後見底的一個月是大成交跌市。如果沒有疫情，有沒有這最後一跌就不知道。

分析了多次升市、跌市的成交量，結論是升市初期成交只比跌市後期多少少，而成交放量就是升市完結的日子。至於跌市初期成交也不會比升市期間多，而跌市後期成交明顯萎縮。

那麼看看今次 I 區的成交量，對後市有什麼啟示？向上、向下的機率？相信大家自己可以判斷得到，不用再解釋了。

要注意的是大市每日成交多少，那一日是升是跌對後市其實冇咩指向性，因為就算是升市大成交，跌市少成交，但只要當月最後是跌市，結果月線圖就變成大成交跌市，所以用每月的成交會更準確去評估後市去向。

還有從以上多次見頂下跌，反而從型態上陰陽燭月線圖收針，又或是一個月大升，之後一個月大跌回吐大部份升幅，再配合大成交，可能就是見頂訊號。那麼今次算係定唔係🤔？所有技術分析，除非是經過自己驗證，人云亦云通常都唔會有好結果。因此如果想更準確去判斷後市，那些傳媒、新聞或財演講咩，可能睇少啲就已經能夠大幅幫助投資成績。

如果覺得文章有用或值得支持，就請 like (like 的方法) 多啲啦！謝謝各位！

2021年4月30日星期五

近期大量股份配股及大股東減持的啟示

之前文章用人民幣來預估恆生指數下半年走勢，不過比對資料只有六年，而且只經歷兩個浪，所以關聯性有待時間驗證。不過每次大市見頂回落，其實基本的 pattern 次次都差不多，只是歷史重演的時候是先知先覺還是後知後覺。

除了以盈利方向，大戶的動作也是一個非常重要的參考。

【美團配股】美團折讓最多8.4%配股　連同發可換股債共籌逾760億、騰訊認購逾30億

東方海外股東配售套現8.4億

近期無論是大型、中型公司不斷的配售股份、股東減持畀到我們一些啟示嗎？記憶中去到這個數量的配股潮不是很多次，如果我哋翻查之前歷史，在高位配股潮之後，基本上每一次最後大市都是從高位回落，無一倖免。不過散戶對這些新聞好似冇咩反應，也不見得會有什麼對策。其實條數好易計，睇跌睇錯咗，大市繼續上升，最多賺少咗。但睇升睇錯咗大市跌係會輸錢。如果一生人之中每次跌市也沒有現金撈底，就真係要好好想清楚自己的操作。

散戶善忘，主要原因每當配股潮出現，傳媒總是不斷帶風向，令到一衆散戶放下介心，而不知不覺淡化了大市將會由高位回落的訊號。最多的評論是只看配股之後當日的走勢，如果當天股價守住了配股價，又或是不跌反升，往往便解讀為市場覺得配股價合理，不必看淡。但我哋知道香港是全世界莊家操控最嚴重的市場，短期走勢大戶想點都得。

另一種說法是很多配股也牽涉幾十億至百億的資金，你以為接貨個個係傻仔，大戶接得梗係有後著。Well，好多人唔知到香港莊家其實最叻係向下炒賺錢，而要向下炒也是要有貨在手。

不過無論故仔點樣作，信唔信才是重點。

【異動股】建滔低開6% 張國榮配售價下限減持

以上配股也可以解讀成公司發展需要、股東私人原因，但建滔配股呢？稍有股齡的散戶應該也聽過張國榮，不是哥哥，而是建滔主席，而佢最出名就是神一般的操作，基本上已經多次佢將自己公司持股高位減持，然後之後低位增持，還有低位買入其他公司股份的輝煌紀錄。今次佢又減持，大家點睇？

2019 年傳媒的作用其實是一個好值得令人思考的問題，一些一直由傳媒帶風向的傳統投資方式，其實真的是長期最有效的投資方式嗎？無論所謂價值投資要長期持有股份、又或是長線投資收息類股份、又或是最新契媽式破壞性創新投資。遇著幾千點的跌市，除了清倉，又有那些股份會逆市上升，我自問就沒有信心可以找到。但一直以來，清倉這個字眼，有多少次出現在傳媒新聞中？

通常大市在高位派貨，也只是 3-6 個月，其實清倉、睇清楚、等一等有那麼難嗎？如果睇錯幾個月後就知道，到時追返，應該也不會太遲。但如果啱咗呢？記住投資永遠 timing 先至係最重要！

如果覺得文章有用或值得支持，就請 like (like 的方法) 多啲啦！謝謝各位！

2021年4月27日星期二

2601 中國太保期權或正股博業績

最近內險股弱勢，因為 A 股調整中。不過內險今年也沒有什麼壞消息，以中國太保之前可能升勢太急，最高升到 $47.75，現價 $28.15 大約回調了 35%。

如果睇返去年業績財務報表 2020年度報告，連續三年也是做好，各項營運指標也是持續向好。

至於公告及通告第一季度保費收入公告，同比上升了 6%，不過如果比對其他內險公司，據報內地首季保險業淨利潤按年增39.3%，就不是太理想。

2601 中國太保 1年日線圖

明天會公佈第一季度業績，相信不會太差，看圖反正跌咗咁多，就博一博買入正股，唔得就算，公佈之後就斬。

如果用期權就可以看一個月或睇長啲都得。因為之前公佈了 2020 年業績 2601 中國太保末期息 1.30 人民幣，除淨日 2021/06/01，如果做 5 月份行使價 $28.00 Short Put，有期權金大約 $1.00，接貨價 $27.00。接貨之後收埋股息大約 $1.462，成本價 $25.538。如果唔理派息，做下年 3 月份行使價 $28.00，有期權金大約 $3.70，接貨價 $24.3。但如果計及除淨之後股價調整，短線期權比遠權更值博，因為 VHSI 近期只有大約 17.0，不是開遠權的理想波幅。

2601 中國太保 5年週線圖

看以上週線圖，不計去年因為疫情股價超跌，$24-25 元有一定支持。不過雖然業績一直做好，但每年股價波幅非常之大，中長線可能去到 $20-22元，值博率才高一些，所以如果今次博到反彈，就食完再等下一次機會。

如果覺得文章有用或值得支持，就請 like (like 的方法) 多啲啦！謝謝各位！

2021年4月23日星期五

24/4/2021 至 30/4/2021 業績公佈的公司

全年業績之後，好快又是第一季度完結，下星期有留意的公司公佈業績有以下幾間：

26/04/2021 復星醫藥 2196 第一季業績截至31/03/21止3個月

27/04/2021 白雲山 874 業績截至31/03/21止3個月

27/04/2021 中國鋁業 2600 第一季業績截至31/03/21止3個月

27/04/2021 洛陽鉬業 3993 季度業績截至31/03/21止3個月

27/04/2021 海螺水泥 914 業績截至31/03/21止3個月

27/04/2021 中遠海運港口 1199 業績截至31/03/21止3個月

27/04/2021 恒生銀行 11 第一期中期股息

27/04/2021 匯豐控股 5 盈利公布 2021年第一季

27/04/2021 華能國際電力股份 902 業績截至31/03/21止3個月

27/04/2021 江西銅業股份 358 第一季業績截至31/03/21止3個月

27/04/2021 國藥控股 1099 季度業績截至31/03/21止3個月

27/04/2021 創維集團 751 第一季業績截至31/03/21止3個月

27/04/2021 萬洲國際 288 業績截至31/03/21止3個月

28/04/2021 比亞迪股份 1211 第一季業績截至31/03/21止3個月

28/04/2021 比亞迪電子 285 第一季業績截至31/03/21止3個月

28/04/2021 建設銀行 939 業績截至31/03/21止季度

28/04/2021 中國人壽 2628 第一季業績截至31/03/21止3個月

28/04/2021 中國海外發展 688 業績 2021第一季

28/04/2021 中國中鐵 390 季度業績截至31/03/21止3個月

28/04/2021 中國電信 728 業績截至31/03/21止3個月

28/04/2021 中信証券 6030 業績截至31/03/21止季度

28/04/2021 中國太保 2601 第一季業績截至31/03/21止3個月

28/04/2021 第一拖拉機股份 38 第一季業績截至31/03/21止3個月

28/04/2021 福萊特玻璃 6865 第一季業績截至31/03/21止3個月

28/04/2021 廣發証券 1776 業績截至31/03/21止季度

28/04/2021 粵海投資 270 業績截至31/03/21止3個月

28/04/2021 海通證券 6837 第一季業績截至31/03/21止3個月

28/04/2021 香港交易所 388 業績截至31/03/21止3個月

28/04/2021 江蘇寧滬高速公路 177 第一季業績截至31/03/21止3個月

28/04/2021 楓葉教育 1317 中期業績截至28/02/21止6個月

28/04/2021 美蘭空港 357 業績/末期股息年度31/12/20

28/04/2021 中國人民保險集團 1339 第一季業績截至31/03/21止3個月

28/04/2021 中國財險 2328 第一季業績截至31/03/21止3個月

28/04/2021 上海醫藥 2607 第一季業績截至31/03/21止3個月

28/04/2021 深圳高速公路股份 548 第一季業績截至31/03/21止3個月

28/04/2021 中國石油化工股份 386 第一季業績截至31/03/21止3個月

28/04/2021 中興通訊 763 第一季業績截至31/03/21止3個月

29/04/2021 農業銀行 1288 業績截至31/03/21止季度

29/04/2021 中國國航 753 第一季業績截至31/03/21止3個月

29/04/2021 中國銀行 3988 業績截至31/03/21止季度

29/04/2021 交通銀行 3328 季度業績截至31/03/21止3個月

29/04/2021 中銀香港 2388 業績 2021年第一季

29/04/2021 中國交通建設 1800 季度業績截至31/03/21止3個月

29/04/2021 中國東方航空股份 670 第一季業績截至31/03/21止3個月

29/04/2021 龍源電力 916 季度業績截至31/03/21止3個月

29/04/2021 中國鐵建 1186 業績截至31/03/21止季度

29/04/2021 中國南方航空股份 1055 第一季業績截至31/03/21止3個月

29/04/2021 中金公司 3908 第一季業績截至31/03/21止3個月

29/04/2021 中國中車 1766 季度業績截至31/03/21止3個月

29/04/2021 中車時代電氣 3898 業績截至31/03/21止3個月

29/04/2021 廣汽集團 2238 第一季業績截至31/03/21止3個月

29/04/2021 工商銀行 1398 業績截至31/03/21止3個月

29/04/2021 新華保險 1336 第一季業績截至31/03/21止3個月

29/04/2021 中國石油股份 857 業績截至31/03/21止3個月

29/04/2021 郵儲銀行 1658 第一季業績截至31/03/21止3個月

29/04/2021 濰柴動力 2338 業績截至31/03/21止3個月

29/04/2021 藥明康得 2359 第一季業績截至31/03/21止3個月

29/04/2021 兗州煤業股份 1171 第一季業績截至31/03/21止3個月

29/04/2021 長飛光纖光纜 6869 業績截至31/03/21止3個月

30/04/2021 中國建材 3323 第一季業績截至31/03/21止3個月

30/04/2021 浙江滬杭甬 576 第一季業績

一大堆又係多到睇唔哂，主要集中國內股份例如內銀、保險、卷商、航運、基建等行業，持續策略集中返係有期權的股份。

2628 中國人壽 1年日線圖

2628 中國人壽有些股票炒唔起就是炒唔起，2628 中國人壽發盈喜都升唔起，一高開就比人由頭沽到尾，有時啲嘢冇得拗嘅。不過最近知道中國人壽的保單紅利實現率好似係 100%，咁可能做佢客仔好過做股東。

2601 中國太保 1年日線圖

保險股都係買其他 1336 新華保險、2601 中國太保、2328 中國財險，之前 1336 新華保險走咗一轉已經食咗糊，睇緊 2601 中國太保，諗緊博唔博業績。

1099 國藥控股 1年日線圖

1099 國藥控股上次業績之後勁升，執咗少少，如果有得回，可能可以走第二轉。

2238 廣汽集團 1年日線圖

2238 廣汽集團也是走了一轉，看業績再決定入唔入返。

0688 中國海外發展 1年日線圖

0688 中國海外發展基本上廿蚊樓下就同佢死過，不過要第一季業績唔好走樣。

1088 中國神華 1年日線圖

最近煤炭股 1088 中國神華、1171 兗州煤業股份都好強勢，不過這星期的氣候峰會，習主席話要 2030 年完全唔用煤，只有十年，雖然 1088 中國神華一直都帶來不錯回報，但應該以後都唔使再睇。

1658 郵儲銀行 1年日線圖

至於內銀股 0939 建設銀行、1288 農業銀行、1658 郵儲銀行、1398 工商銀行、3988 中國銀行、3328 交通銀行，今年頭都算強勢，之前做好多 1658 郵儲銀行，但而家都冇乜機會，而且內銀股嘅期權金通常都比較少，唔係好值博。

如果覺得文章有用或值得支持，就請 like (like 的方法) 多啲啦！謝謝各位！

2021年4月20日星期二

從人民幣匯價看恆生指數下半年走勢

2019 年 11 月份出了一篇文章恆生指數 vs 人民幣匯價探討恆生指數跟人民幣匯價的相關性。結論是恆生指數所包括的國內公司比重越來越大，而對這些賺人民幣的公司，當盈利轉為香港的財務報表會以港幣計算，所以人民幣匯價就直接影響了這些公司的盈利收入。當然一個地方貨幣強勢，就會引來資金流入也是推動資產價格的其中之一個原因。

HSI 5年週線圖 vs CHN.HKD

上一次 2019 年 11 月估計人民幣匯價差不多見底，而有利恆生指數回升。短期是回升了，但最後因為 2020 年初 COVID-19 開始爆發，人民幣匯價跟恆生指數雙雙再跌破下一個低位才回升。如果沒有 COVID-19，恆生指數會再下跌嗎？就真係不知道。

HSI 6年週線圖 vs CHN.HKD

人民幣對港元匯價由去年 5 月見底大約 1.0851 開始回升到今年 2 月份高位 1.2066，升幅大約 11.2%。恆生指數在去年 3 月份見底反覆回升到今年 2月份，走勢兩者大致相若。

要估計貨幣匯價走勢其實是相當困難，由其是人民幣不是自由浮動，是以國內政策推動其走勢。

不過近期開始有新聞睇淡人民幣下半年走勢建行:人民幣次季存在貶值可能，要知道國內要求政治正確，這樣放風未必冇因。

雖然人民幣不是自由兌換，但全世界也是睇美元頭，如果美元下半年轉強，人民幣就會有貶值壓力【EJFQ信析】不列滙率操縱國人幣有貶值壓力。

2 月份文章恆生指數 2021 年波幅預計分析計算今年恆生指數暫時低位 27079 點，暫時高位 31183 點，到現在還沒有打破。雖然估計今年也有 8000 點大波幅，但如果人民幣下半年轉弱，要上高位就有啲難度。另一個可能是人民幣匯價牛皮，在現水平上落，那麼今年可能就只有 4000-6000 點細波幅。

但正所謂十個牛皮九個淡，還有五窮六絕嚟緊，所以之後一、兩季都係傾向看淡恆生指數，但回撤幅度究竟是 26000(5000點)、25000(6000點)、24000(7000點)、還是之前計算的終極 23183(8000點)，就估計不了。

不過相信今次回撤一定是急且快，所以要準備定子彈，還有研究定目標物，等到時可以撈底，那麼今年的回報就應該不錯了。

如果估錯呢？就唯有繼續近期的短炒、等運到期權操作，有機會先至做，賺個飯盒錢算。

上一篇文章真係多謝哂各位網友支持，足夠請我飲一杯咖啡。原來真係有好多網友唔知道咁樣可以支持啲 blogger。本來想寫多啲 AdSxxse，但 Gxxgle 好小氣，我而家都驚緊佢會 block 我 account，咁我杯咖啡就凍過水😝。希望網友以後或在其他 blog 閱讀到好的文章，就請 like (按彩色物件) 多啲啦！謝謝各位！

2021年4月16日星期五

9888 百度集團期權+正股的操作考慮

之前因為 Bill Hwang 旗下的對冲基金 Archegos Capital 持股被斬倉，導致一堆係美國上市的中概股急跌，百度美股(BIDU)也是其中之一。再加上近期科技股弱勢，股價由最高 354.82 剛好腰斬一半多啲到暫時近期低位 174.05。

BIDU 百度 1年日線圖

香港掛牌的 9888 百度集團因為是新上市，剛好遇到斬倉，暫時最低去到 200.40。

9888 百度集團日線圖

看看 3月26-30 股價在 200-210 蚊徘徊的時候，如果那幾天做期權 Short Put 例如 6月份行使價 200.00，期權金有大約 20元。再看看今日 16 日股價大約 205，跟 3 月尾時差不多，但同一月份同一行使價期權開價只有大約 11.5，即是正股股價沒有大變化，但短短兩個星期期權金收縮了差不多 40%。

9888 百度集團 Jun29'21 200.00 Put

原因是 IV (Implied volatility) 在斬倉那幾日大漲，因為市場預期波幅增加令到期權金也相應增加。但當一切歸於平靜，IV 回落，期權金也會逐步回落。

基於期權這個特性，當某股票股價突然大跌，由其是一些短期突發時件而令到 IV 大漲，Short Put 期權就非常適合想接飛刀的人士。因為只要事件趨於平靜，就算股價沒有怎樣上落，期權也可以有可觀回報。就算開倉之後股價進一步下跌，但扣除期權金接貨，成本也會比當刻買入正股便易。

如果以之前的經驗，不是因為公司本身問題而是金融機構原因導致斬倉股價急跌，通常當沽壓完成後中長期都會回升。之前就有一批股份例如 0688 中國海外發展、0883 中國海洋石油、0941 中國移動等，因為美國制裁基金要沽貨或交易所要除牌而遭洗倉，但之後都會反覆回升。

如果想中長期買入這些正股，當然就要等斬倉潮完結，還有等短期獲利盤平倉，當股價貼近之前低位時買入，可能值博率會高一點，今天的走勢似是這樣嗎？穩陣一點還要分多幾注，因為有時會是低高腳，但也可以是高低腳，還有睇美股 BIDU 走勢其實未出低高腳，雖然未必一定會出現，無論怎樣中長期贏面應該博得過。

突然間發現唔知網友知唔知道，Facebook 及 Youtube 可以 Like👍🏻 以示對作者支持，blog 都可以只要讀者按下彈出來或在上下兩旁的彩色物件就可以，即是 x告。多少不是重點，重點是知道有人睇可以堅持寫下去，先多謝各位支持😅。

2021年4月12日星期一

第二 round 全勝

估唔到咁快就完成第二 round，都係靠 7226 ＸＬ二南方恒科，其他正股只買了 1099 國藥集團，執咗少少。其餘期權仲係等運到，但全部也有微利。

7226 ＸＬ二南方恒科日線圖

其實 7226 ＸＬ二南方恒科每一 round 也只是幾日內完成，都只是低買、高賣。Round 1 在兩日跌市分段買入，之後 3 日就反彈了差不多 34% 波幅，但分段操作其實只賺到大約投入資金 10%。

Round 2 一樣在兩日跌市分段買入，今次返彈比較慢，6 日才反彈了 28%，但賺到的也是投入資金大約 10% 因為買入價位比較好啲。

整體策略都是跟返市場個 bit，跌個日就考慮買唔買，大陰燭就必買。升個日就考慮賣唔賣，大陽燭或裂口大幅高開必走。

當然如果策略是這樣在 round 0 的時候已經奶咗嘢，就算 round 1 及 2 勝了可能只係打過和。Well，問題在恆生科技指數長期是否會升，有冇得守？而且以暫時跌幅，每個 round 其實大約只用了 20% 整體資金。除非是股災級跌幅，有嬴有輸始終都會追得返。

7226 ＸＬ二南方恒科波幅比較大，而且大市反彈一定跟得足，所以沒有了揀錯股的煩惱，也不需要分散投資，變成大市升但組合未必升的困局。還有啱啱發現原來 7226 ＸＬ二南方恒科唔使比印花稅，更加減輕成本，增加回報。

一個月完成了兩個 round，如果每個月也有就好了，不過機會是要等的，第三 round 這兩日有機會嗎？

賺了錢，使咗先至係自己，唔係就永遠幫人哋袋住先，咁同家人食返餐飯就是最好選擇。

今次個湯頭唔錯，老一輩人股票賺到錢都鍾意魚翅撈飯，希望 7226 ＸＬ二南方恒科可以帶比我每月一餐😅。

2021年4月8日星期四

1044 恆安國際 2020-12-31 全年業績

1044 恆安國際 3 月 19 日公告二零二零年年度業績

https://www1.hkexnews.hk/listedco/listconews/sehk/2021/0319/2021031900274_c.pdf

以港幣計算集團 2020 年全年收入較去年同期增長 6.1%，毛利同比增加 16.0%，毛利率 42.3% 同比增加 3.63%。公司擁有人應佔溢利同比增加 25.4%，每股基本盈利港幣 4.6055 元同比增加25.5%，末期股息每股人民幣 1.2000元，全年股息港幣 2.8978 元同比增加 15.3%。

雖然收入增長不多，但因為成本減少，毛利大幅增加，加上人民幣去年回升，以港幣計盈利上升超過 25%，其實業績不算太差。

1044 恆安國際 1年日線圖

但市場永遠有預期這個任大戶操控的藉口，不及預期，業績好都冇用，由 3 月 19 日公佈業績之後股價就不斷下跌。

不過去年業績已經過去，最重要是今年業績怎樣，如果看以上管理層評語，成本控制上半年應該還是可以，所以預計今年盈利應該也不會太差。

1044 恆安國際 5年週線圖

睇返五年周線圖，股價這幾年也是在 50-80 蚊之間上落，最近又去返 50 蚊邊。

1044 恆安國際末期息 1.30 人民幣，除淨日 2021/05/20，如果做 4 月份行使價 $50.00，有期權金大約 $0.75，接貨價 $49.25。如果唔理派息，做下年 3 月份行使價 $49.00，有期權金大約 $5.50，接貨價 $43.5，好似唔錯，但中間派兩次息，差不多兩個幾，咁期權金就不太吸引。現價 $50.60，P/E 只有 10.99倍，是歷年最低估值，也可能是內需股最便宜一間。咁可能買入正股收下息，博上返 70 蚊回報會高啲。